ნაციონალური მოძრაობის ლიდერის, ნიკა მელიას განცხადებით, ოპოზიცია შეთანხმდა, რომ გააკეთებენ ყველაფერს, რათა ნიკა გვარამიას დაკავების შემდეგ, მთავარმა არხმა მუშაობა არ შეწყვიტოს.

"ნომერი პირველი მნიშვნელოვანი საკითხი, რაც სასწრაფოდ გადასაწყვეტია და სასწრაფო გადაჭრაში ვგულისხმობ, ვადას დღეების თვალსაზრისით — ანუ, დღეები არის მნიშვნელოვანი იმისთვის, რომ მთავარი არხი, როგორც თავისუფალი მედიის ერთ-ერთი თვალსაჩინო წარმომადგენელი, გადარჩეს.

თითოეული ჩვენგანი, ვინც დღეს აქ ესწრებოდა შეხვედრას, შევთანხმდით, რომ გავაკეთებთ ყველაფერს სხვადასხვა შესაძლებლობით, რომ არხმა არ შეწყვიტოს მაუწყებლობა მას შემდეგ, რაც მისი სულის ჩამდგმელი, დამფუძნებელი და დირექტორი, ნიკა გვარამია უკანონოდ დააკავეს. ეს არის მნიშვნელოვანი გადაწყვეტილება, რომელიც არა მარტო მთავარი არხის თანამშრომლებისთვის არის მნიშვნელოვანი, არამედ მთლიანად საზოგადოებისთვის", — აღნიშნა მან.

მელიამ თქვა ისიც, რომ გეგმავენ კოორდინაციას სხვადასხვა ჯგუფში, სხვადასხვა მიმართულებით, თუმცა ამ მხრივ, არ იქნებიან პროგნოზირებადი ქართული ოცნებისთვის.

"იქნება აქტიური კოორდინაცია სხვადასხვა ჯგუფში, როგორც საერთაშორისო მიმართულებით, იქ, სადაც უფრო მკაფიო უნდა გახდეს, როგორც პარტიების, ასევე, სამოქალაქო საზოგადოების, არასამთავრობო ორგანიზაციების და მედიების პოზიცია ცნობილი. ერთმანეთთან კოორდინაცია მოხდება ამ მიმართულებით.

ვიცი, რომ კითხულობთ ხოლმე, აქციები ჩატარდება-არ ჩატარდება? ამასთან დაკავშირებითაც, ბუნებრივია, მჭიდრო კომუნიკაცია გვექნება, თუმცა არ ვიქნებით ადვილად პროგნოზირებადები ქართული ოცნებისთვის, არ ვიქნებით ადვილად გამოსაცნობები ჩვენს მოქმედებებში და გეგმების აღსრულებაში", — განაცხადა მელიამ.

დღეს, სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა.

განაჩენის გამოცხადების შემდეგ, სასამართლო დარბაზიდან გვარამიამ დაპოსტა და მოუწოდა ხალხს დარჩნენ მთავარ არხზე და ერთად მოიპოვონ თავისუფლება. არხის ჟურნალისტებმა კი განაცხადეს, რომ ბრძოლა გრძელდება, უფრო მეტად, ვიდრე აქამდე.

ამავე თემაზე: