"ნებისმიერი გადაწყვეტილება სასამართლოსი არის მხოლოდ სამართლებრივი და რა თქმა უნდა, პოლიტიკურო გავლენა მას ვერ ექნება", — ასე უპასუხა ეკონომიკის მინისტრმა ლევან დავითაშვილმა კითხვას, არის თუ არა ნიკა გვარამიას დაპატიმრება პოლიტიკური გადაწყვეტილება.

დავითაშვილის აზრით, ქვეყანაში სასამართლო სისტემა პოლიტიკური პროცესებისგან დამოკიდებელია. მას, ასევე, ჰკითხეს, ოპოზიციური არხის დირექტორის დაპატიმრებით, საერთაშორისო ასპარეზზე ქვეყნის იმიჯი ილახება თუ არა, რაზეც დავითაშვილმა თქვა:

"საქართველოს რეპუტაცია და იმიჯი უნდა იყოს იმგვარი, როგორიც არის ევროპული ღირებულებებით განსაზღვრული. ქვეყანა მიდის ევროპისკენ, ევროპული ინტერგაციისკენ, რაც იმას ნიშნავს, რომ კანონის უზენაესობა არის ძალიან მნიშვნელოვანი, ჩვენ ვაშენებთ სამართლებრივ ქვეყანას".

ჟურნალისტის ჩაკითხვაზე, ჯდება თუ არა მსგავსი გადაწყვეტილება ევროპულ ღირებულებებში, დავითაშვილმა კითხვითვე უპასუხა:

"კანონის წინაშე საქართველოს თითოეული მოქალაქე არის თანაბარი, ვთანხმდებით ამაზე?"

დღეს, სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა. სასჯელის მოხდის ვადა 16 მაისიდან დაიწყო და მოსამართლემ გვარამიას დარბაზშივე დაკავების ბრძანება გასცა.

ნიკა გვარამიას წინააღმდეგ გამოძიება პროკურატურამ 2019 წლის 20 ივლისს დაიწყო. საქმე ეხება ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ. კერძოდ, ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენებას ედავებოდნენ.

განაჩენის გამოცხადების შემდეგ, სასამართლო დარბაზიდან გვარამიამ დაპოსტა და მოუწოდა ხალხს დარჩნენ მთავარ არხზე და ერთად მოიპოვონ თავისუფლება. არხის ჟურნალისტებმა კი განაცხადეს, რომ ბრძოლა გრძელდება, უფრო მეტად, ვიდრე აქამდე.

საერთაშორისო გამჭვირვალობა საქართველომ აღნიშნა, რომ გვარამიას დასჯით სასამართლომ პოლიტიკური დაკვეთა შეასრულა. GDI-ის ხელმძღვანელმა, ედუარდ მარიკაშვილმა კი თქვა, რომ ეს კიდევ ერთი მაგალითია იმისა, რომ ავტორიტარიზმში ვცხოვრობთ. გიორგი მშვენიერაძის განცხადებით, ამ ქვეყანაში ყველაფერი დანაშაულია, ბიძინა თუ მტრად გთვლის და ყველაფერი კანონიერია, ბიძინას ლაქია თუ ხარ.

ამავე თემაზე: