მარიუპოლიდან ევაკუირებული ალინა კოზიცკა ყვება, რომ გამოსვლისას ქალაქი იყო გატეხილი, სევდიანი და დაღლილი. თუმცა აღნიშნა, რომ მარიუპოლი მთელი ძალით იდგა, ისევე, როგორც ხალხი.

მისი თქმით, მზადაა, მონაწილეობა მიიღოს ქალაქის აღდგენაში, მაგრამ მხოლოდ იმ შემთხვევაში, თუ იქ უკრაინის დროშა იქნება.

"მარიუპოლში სიბნელეა მაშინაც კი როცა მზეა, მაგრამ ქალაქი დგას, მაგრამ ქალაქი დგას. თვალცრემლიანი ვმართავდი მანქანას. მჯერა, რომ ოდესმე ისევ მსუბუქი, მყუდრო და მხიარული იქნება. დარწმუნებული ვარ, ჩვენ დავბრუნდებით მარიუპოლში. მე მჯერა, რომ ევროპა დაეხმარება მის აღდგენაში. მსურს მონაწილეობა მივიღო ქალაქის აღდგენასა და მის შემდგომ განვითარებაში. მაგრამ მხოლოდ იმ შემთხვევაში, თუ უკრაინის დროშის ქვეშ იქნება", — ამბობს ის.

ალინას ისტორიას მარიუპოლის საკრებულო ტელეგრამ არხზე აქვეყნებს. ის ყვება, რომ მისთვის ყველაზე რთული დღე ქალაქში 10 მარტს იყო, როდესაც მის საცხოვრებელთან ჩამოაგდეს ბომბები. ალინას თქმით, მაშინ ისე, როგორც არასდროს, სურდა, ეცოცხლა.

"ყველა ფანჯარა ჩამოინგრა, ჭერი ჩამოიშალა, გაოგნებული დავრჩი", — ამბობს ის.

ალინა 7 აპრილს საკვების ასაღებად პირველად გავიდა. ამბობს, რომ გაოცებული იყო იმით, თუ როგორ შეიცვალა ხალხი.

"როდესაც გამოჩნდა შანსი გარეთ გამოვსულიყავი ხალხის ძებნა დავიწყე. წარმოუდგენელი შეგრძნებაა, როცა ხედავ თუნდაც ბინძურ, სევდიან, მაგრამ ნაცნობ სახეებს", — ყვება ალინა.

საკრებულო ტელეგრამ არხზე ასევე აქვეყნებს ფოტოებს, რომელიც ალინამ მარიუპოლში ყოფნისას გადაიღო.

მარიუპოლის მერის, ვადიმ ბოიჩენკოს განცხადებით, ოკუპანტებმა ქალაქი შუა საუკუნეების გეტოდ გადააქციეს. მისი თქმით, მედიკამენტების, სამედიცინო დახმარების, წყლით მომარაგებისა და კანალიზაციის სისტემების აღდგენის გარეშე, ქალაქში ეპიდემია დაიწყება.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში