მარიუპოლის მერის, ვადიმ ბოიჩენკოს განცხადებით, ოკუპანტებმა ქალაქი შუა საუკუნეების გეტოდ გადააქციეს. მისი თქმით, მედიკამენტების, სამედიცინო დახმარების, წყლით მომარაგებისა და კანალიზაციის სისტემების აღდგენის გარეშე, ქალაქში ეპიდემია დაიწყება.

ბოიჩენკო აცხადებს, რომ რუსეთი აგრძელებს 24 თებერვალს დაწყებულ გენოციდს. მისი თქმით, ხალხს სასიკვდილო საფრთხე ემუქრება, რის გამოც, საჭიროა ქალაქის სრული ევაკუაცია

"ოკუპანტებმა მარიუპოლი შუა საუკუნეების გეტოდ აქციეს. ასე რომ, დაღუპულთა რიცხვიც შესაბამისი იქნება. ქალაქში მედიკამენტებისა, სამედიცინო დახმარების, წყალმომარაგებისა და სათანადო კანალიზაციის აღდგენის გარეშე, ეპიდემიები იფეთქებს. დღეს მოსახლეობის უმრავლესობა მოხუცები და ავადმყოფები არიან. სათანადო პირობების გარეშე, მოწყვლადი ჯგუფების სიკვდილიანობა გაიზრდება. მარიუპოლის ზოგიერთი მაცხოვრებელი ახლომდებარე სოფლებიდან დაბრუნდა ქალაქში, რადგან მათ არ უშვებენ უკრაინის კონტროლირებად ტერიტორიაზე, მკაცრი ფილტრაციის სისტემის გამო", — თქვა მან.

ალყაში მყოფი მარიუპოლის საკრებულოს ცნობით, გაუსაძლისმა პირობებმა და ავადმყოფობამ, წლის ბოლომდე შესაძლოა, 10 ათასზე მეტი ადამიანის სიცოცხლე იმსხვერპლოს. მათივე ინფორმაციით, ამჟამად მარიუპოლში იმყოფება 150 000-170 000 ადამიანი.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში