ერთიანი ნაციონალური მოძრაობის პოლიტსაბჭოს თავმჯდომარე, კობა ნაყოფია ამბობს, რომ მიხეილ სააკაშვილი იუსტიციის სამინისტროს შეთავაზებაზე, გადაიყვანონ ვივამედში გამოკვლევების ჩასატარებლად, თანხმობას აცხადებს.

მისივე თქმით, დღეს ექსპრეზიდენტის მოსანახულებლად ოჯახის წევრები მივიდნენ, ამიტომ სააკაშვილს დღეს გადაყვანაზე უარის თქმა მოუწია.

"მას უკვე აცნობეს, სანამ მე შევიდოდი, რომ ის იქნებოდა გადაყვანილი, უბრალოდ, აქ არის ერთი ძალიან მნიშვნელოვანი დეტალი, რომ იქ არ არის საუბარი მის მკურნალობაზე გადაყვანასთან დაკავშირებით, საუბარია მხოლოდ გამოკვლევასთან დაკავშირებით, ანუ მას შესთავაზეს, რომ ვივამედში გადაიყვანდნენ გამოკვლევების ჩასატარებლად და ისევ უკან დააბრუნებდნენ პენიტენციურ დაწესებულებაში.

შესთავაზე, რომ ეს მომხდარიყო დღეს, რაზეც უპასუხა, რომ დღეს ვერ წავიდოდა, რადგან დღეს ისედაც უიშვიათესი დღეა მისი აქ ყოფნის პერიოდის განმავლობაში, როდესაც მას ეძლევა შესაძლებლობა შეხვდეს ოჯახის წევრებს. ამის გამო მოუწია მას ამ შემოთავაზებაზე უარის თქმა", — ამბობს ის.

იუსტიციის მინისტრის, რატი ბრეგაძის განცხადებით, მიხეილ სააკაშვილს, შესაძლო გართულებების თავიდან არიდების მიზნით, შესთავაზებენ, რომ გადაიყვანონ კლინიკა ვივამედში, სადაც მას გამოკვლევებს ჩაუტარებენ.