უკრაინის პრეზიდენტის ადმინისტრაციის უფროსი მრჩევლის, ალექსეი არესტოვიჩის თქმით, ახლა უკრაინაში "ოთხი ახალი ბუჩაა", ორი ზაპოროჟიეს, ორი კი ხერსონის მიმართულებით. განცხადებას Unian ავრცელებს.

არესტოვიჩი ამბობს, რომ რუსული არმია უკრაინაში გენოციდს ახორციელებს და ახლა მთავარი უკრაინელი ხალხის გადარჩენაა.

"მასობრივი გაუპატიურებები, ბავშვების, მოხუცების მკვლელობები, მშვიდობიანი მოსახლეობის სიკვდილით დასჯა და ა.შ, რა "ძმობაზე" შეიძლება ვისაუბროთ? ურთიერთობების აღდგენაც რომ მოხდეს, ბოლოს და ბოლოს მეზობლები ვართ, ეს ძალიან შორეული ამბავია. ახლა ჩვენი ამოცანა გადარჩენაა", — განაცხადა მან.

კიევის ოლქი რუსი ოკუპანტებისგან 2 აპრილს გათავისუფლდა. ირპენმა, ბუჩამ, გოსტომელმა და სხვა ქალაქებმა, სადაც უკრაინის ჯარები შევიდნენ, მსოფლიოს ხელახალი გამოღვიძება აიძულა.

მედიაში გავრცელდა ფოტოები ბუჩას ქუჩებიდან, რომელიც სავსე იყო ცხედრებით — მათ ნაწილს ხელები ჰქონდათ შეკრული, ნაწილის გვერდით ველოსიპედები ეყარა, ნაწილი კი, მინიმუმ, სამი კვირის წინ მაინც იყო მოკლული.

18 აპრილს ოკუპანტი ქვეყნის პრეზიდენტმა, ვლადიმერ პუტინმა ბუჩაში დანაშაულებში ბრალდებულ 64-ე მოტომსროლელ ბრიგადას "საპატიო" წოდება გვარდიელი მიანიჭა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში