უკრაინის პრეზიდენტმა, ვოლოდიმირ ზელენსკიმ დღეს დიდი შვიდეულის ქვეყნების ლიდერებს მიმართა და ისაუბრა გეგმაზე, რომელიც ომში მოგებისთვის, რუსეთის დამარცხებისა და უკრაინის შემდგომი აღდგენისთვის არის საჭირო. ზელენსკიმ აღნიშნა, რომ უპირველეს ყოვლისა, უკრაინას სჭირდება მეტი იარაღი.

"რა უნდა გავაკეთოთ, რომ თავისუფლების დაცვის ბრძოლაში გავიმარჯვოთ? უკრაინისა და მთელი მსოფლიოს თავისუფლების? უპირველეს ყოვლისა, იარაღები. მადლობელი ვარ თქვენი იმ ყოვლისმომცველი დახმარებისთვის, რომელიც უკვე მივიღეთ. რადგან მეორე მსოფლიო ომში თავისუფლების ბედი ბრძოლის ველზე წყდებოდა. ამიტომ უკრაინას სჭირდება იარაღები და ყველა თავდაცვითი აღჭურვილობა, რაც ტირანიის დამარცხებაში დაეხმარება.

კონკრეტულად, M142 HIMARS, M270 MLRS და სხვა იარაღები, რომლებსაც თქვენი ძლიერი სახელმწიფოებისგან ვითხოვთ. ისინი რომ გვქონოდა, ჩვენ უამრავი ადამიანის გადარჩენას შევძლებდით", — განაცხადა მან.

მისივე თქმით, ასევე, საჭიროა დამატებითი სანქციები, კერძოდ ექპორტ-იმპორტის შეჩერება რუსეთთან და ყველა იმ თანამდებობის პირის დასანქცირება, ვინც რუსეთის ომს მხარს უჭერს.

"შემდეგი არის სანქციები. უკრაინა ყოველთვის მადლობელი იქნება თქვენი ამ უპრეცედენტო სანქციების, რომელიც მშვიდობის ინტერესებს ემსახურება. მაგრამ ომი გრძელდება, აქედან გამომდინარე სპეციალური საერთაშორისო ჯგუფის ექსპერტებმა, რომლებსაც მაიკლ მაკფოლი და ანდრეი ერმაკი ხელმძღვანელობენ, სამოქმედო გეგმა შექმნეს, რათა ამ ომისთვის რუსეთის წინააღმდეგ სანქციების გამკაცრდეს. ეს აუცილებელია — გევედრებით — დანერგეთ ეს სანქციები და გვითხარით თქვენი ანალიზი.

არ უნდა იყოს ექსპორტ-იმპორტი რუსეთთან მანამ, სანამ რუსეთი იმ ფულს, რომელიც გამოიმუშავა, უკრაინისა და მთელი ევროპის თავისუფლების განადგურებაში ხარჯავს. დემოკრატიული მსოფლიო უნდა იყოს პრინციპული საკუთარი თავის დაცვაში. უნდა ვიპოვოთ გზები იმ პოლიტიკოსებისა და ქვეყნებისთვის, რომლებიც რუსეთს სანქციების გვერდის ავლაში ეხმარებიან.

ასევე, ყველა რუსი ოფიციალური პირი, სამართალდამცავი ორგანოს წარმომადგენლები, რაც მთავარია, მოსამართლეები, რომლებიც ამ ტირანიისთვის მუშაობენ, უნდა იყვნენ ამ სანქციების სიაში. ისინი იქ ჯერ არ არიან", — აღნიშნა მან.

ზელენსკის თქმით, ასევე, საჭიროა ვიზის შეზღუდვები რუსეთის მოქალაქეებზე, რათა მათ ვერ შეძლონ თავისუფალი სამყაროს გამოყენება გართობისა და შოპინგისთვის. მისი თქმით, ყველამ უნდა იბრძოლოს ტირანიის წინააღმდეგ, იმის ნაცვლად, რომ შეეგუოს ამას.

კიდევ ერთი საკითხი, რაზეც უკრაინის პრეზიდენტმა გაამახვილა ყურადღება, ქვეყნის ფინანსური მხარდაჭერაა, როგორც ახლა, ომის მიმდინარეობის დროს, ასევე, შემდეგ. ზელენსკიმ აღნიშნა, რომ საჭიროა მარშალის გეგმის მსგავსი, რათა უკრაინამ შეძლოს ძალების აღდგენა.

"ასეთი გეგმა გვჭირდება და ის გვჭირდება ახლავე, რათა მსოფლიომ დაინახოს, რომ თავისუფლება იმარჯვებს, არა მხოლოდ ბრძოლის ველზე, არამედ ცხოვრებაში. სანამ ომი გრძელდება, ჩვენ გვჭირდება 5-დან 7 მილიარდ დოლარამდე ყოველ თვე. როცა ომი დასრულდება, ჩვენ უნდა აღვადგინოთ ყველაფერი, რაც რუსეთმა დაანგრია, რომლის ღირებულებაც 600 მილიარდ დოლარს აჭარბებს.

ეს ძალიან ბევრია ჩვენი სახელმწიფოსთვის. ეს არ არის შესაძლებელი უკრაინისთვის, მაგრამ შესაძლებელია თქვენთვის. რუსეთს უნდა, რომ ევროპაში გადაინაცვლოს, ყველა პოტენციური აგრესორი მსოფლიოში, რომელსაც მეზობლების ცხოვრების დანგრევა სურს, ახლა რუსეთს აკვირდება, მიაღწევს თუ არა ის წარმატებას და შეძლებენ თუ არა თავად იმავეს გამეორებას", — თქვა ზელენსკიმ.

ამავე თემაზე:

• ზელენსკი: ყოველ დღე ჩვენი ხალხი ხედავს და იხოცება იმით, რაც შორეულ წარსულში უნდა დარჩენილიყო

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში