უკრაინის პრეზიდენტის, ვოლოდიმირ ზელენსკის განცხადებით, აზოვსტალიდან 300-ზე მეტი სამოქალაქო პირის გადარჩენა შეძლეს, მეორე ეტაპზე კი დაჭრილებისა და მედიკოსების გამოყვანაზე სურთ. მან მადლობა გადაუხადა წითელი ჯვრის საერთაშორისო კომიტეტისა და გაეროს გუნდებს დახმარებისთვის.

მისივე თქმით, ცდილობენ აზოვსტალიდან მარიუპოლის მცველებიც გამოიყვანონ, მაგრამ ეს ძალიან რთული და მნიშვნელოვანი პროცესია.

"დარწმუნებული ვარ, ყველას ესმის ამ სირთულის მთავარი მიზეზი და ასევე სად მდებარეობს ეს მიზეზი. მაგრამ იმედს არ ვკარგავთ. ჩვენ არ ვჩერდებით. ჩვენ ყოველდღე ვეძებთ ისეთ დიპლომატიურ ვარიანტს, რომელმაც შეიძლება იმუშაოს. ჩვენი გუნდი ხვალ ემზადება და მარიუპოლისა და მიმდებარე დასახლებების მაცხოვრებლებისთვის ჰუმანიტარული დერეფნების მუშაობის გასაგრძელებლად", — განაცხადა მან.

7 მაისს უკრაინის ვიცე-პრემიერმა განაცხადა, რომ აზოვსტალიდან ყველა ქალი, ბავშვი და მოხუცი ევაკუირებულია. მანამდე სოციალურ ქსელებში გავრცელდა დეზინფორმაცია იმის შესახებ, რომ აზოვის პოლკი, რომელიც მარიუპოლში, აზოვსტალშია გამაგრებული დანებდა. წერდნენ, თითქოს მარიუპოლის მცველებმა თეთრი დროშა აღმართეს და რუსებს ჩაბარდნენ.

აზოვის პოლკის პრესსამსახურმა, ეს ცნობები უარყო და განმარტა, რეალურად რისთვის იყენებენ თეთრ დროშას. მათი თქმით, ეს ევაკუაციის ნიშანია და პროცესის დაწყების დროს რუსებიც აღმართავენ.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში