შინაგან საქმეთა სამინისტრო თბილისში, შუამთის ქუჩაზე საპოლიციო ღონისძიების შესახებ განცხადებას ავრცელებს. უწყების თქმით, დააკავეს 2 პირი, რომლებიც განზრახ შეეჯახენ პოლიციელის მანქანას და შემთხვევის ადგილიდან მიიმალენ. მათი თქმით, ავტოსაგზაო შემთხვევის დროს დაშავდა 1 პოლიციელი.

"გამოძიებით დადგინდა, რომ მართვის უფლების არმქონე ბ.შ. მიმდინარე წლის 15 აპრილს, თბილისი-სენაკი-ლესელიძის ავტომაგისტრალის 39-ე კილომეტრზე, ტოიოტას მარკის ავტომობილით, განზრახ შეეჯახა პოლიციელის ავტომანქანას და შემთხვევის ადგილიდან თანმხლებ პირებთან — გ.შ.-სთან და მ.ხ.-სთან ერთად მიიმალა", — აცხადებენ უწყებაში.

მათივე თქმით, ერთი პირი პოლიციელზე თავდასხმის, მეორე კი დანაშაულის შეუტყობინებლობის ბრალდებით დააკავეს. გარდა ამისა, უწყებაში ამბობენ, რომ ამავე სისხლის სამართლის საქმის გამოძიების ფარგლებში, 5 მაისს დანაშაულის შეუტყობინებლობის ბრალდებით დააკავეს კიდევ ერთი ადამიანი.