სახალხო დამცველის განცხადებით, უკრაინიდან ლტოლვილებს ოჯახებს ღია ცის ქვეშ დარჩენის საფრთხე ემუქრებათ. ომბუდსმენის განმარტებით, უკრაინის მოქალაქეების მიმართვის და მედიაში გავრცელებული ინფორმაციის საფუძველზე ცნობილი გახდა, რომ სახელმწიფო დაფინანსებით სასტუმროებში განთავსებულები გააფრთხილეს, 6 მაისიდან უახლოეს დღეებში გაათავისუფლონ საცხოვრებელი ფართები.

მისივე თქმით, უკრაინიდან დევნილმა მოქალაქეებმა, არ იციან რა ბედი ეწევათ მათ უახლოეს მომავალში და დახმარების პროგრამების შესახებ საკმარისი ინფორმაცია არ აქვთ.

"პარალელურად, მედიასაშუალებებში ვრცელდება ინფორმაცია, რომ საქართველოს მთავრობის გადაწყვეტილებით, იზრდება უკრაინელთა სოციალური მხარდაჭერის დაფინანსება, რომელიც საცხოვრებლით უზრუნველყოფის ხარჯებსაც მოიცავს, რაც ნამდვილად მისასალმებელია. თუმცა, უნდა აღინიშნოს, რომ ამ დაფინანსების შესახებ არც რაიმე ნორმატიული გადაწყვეტილება მოიპოვება, არც რომელიმე შესაბამისი სახელმწიფო უწყების ვებ-გვერდზე დევს ოფიციალური განცხადება და არც შესაბამისი უწყებების წარმომადგენლები ფლობენ რაიმე ინფორმაციას ამ კონკრეტულ საკითხთან დაკავშირებით", — წერს ის.

სახალხო დამცველი მოუწოდებს საქართველოს მთავრობას და თანამდებობის პირებს — მაქსიმალურად შემჭიდროვებულ ვადებში გაატარონ ყველა აუცილებელი ღონისძიება კონკრეტული გადაწყვეტილებების მისაღებად და მოხდეს როგორც ცალკეული უწყებების, ასევე უკრაინიდან დევნილი მოქალაქეების სათანადო ინფორმირება იმის შესახებ, თუ როგორ, როდის და სად მოხდება მათი განსახლება.