ცენტრი ემპათია ექსპრეზიდენტ მიხეილ სააკაშვილის ჯანმრთელობის მდგომარეობაზე დასკვნას აქვეყნებს. ისინი აღნიშნავენ, რომ დასკვნა შემუშავებულია შეზღუდული სამედიცინო ინფორმაციისა და კლინიკური შემოწმების შეუძლებლობების პირობებში.

დოკუმენტში ვკითხულობთ, რომ, როგორც პენიტენციურ სისტემაში, ასევე, გორის ჰისპიტალში ყველა ეტაპზე სააკაშვილის მიმართ არასათანადო სამედიცინო მომსახურება, ფსიქოლოგიური ზეწოლა და ფიზიკური ზემოქმედებები მიმდინარეობდა.

მათი თქმით, სახეზეა სეიროლეფსიური სინდრომი. ამასთან, ექსპრეზიდენტს აღენიშნება ვერნიკე ენცეფალოპათია, დაუზუსტებელი ცილოვან-ენერგეტიკული უკმარისობა, პოლინეიროპათია კვებითი დეფიციტის დროს. ასევე, პოსტტრავმული სტრესული აშლილობა, თავის ტვინის დაზიანებითა და დისფუნქციით გამოწვეული ორგანული ემოციურად ლაბილური (ასთენიური) აშლილობა, რაც ასევე, შერეულ შფოთვით-დეპრესიულ ეპიზოდებს მოიცავს. გარდა ამისა, რეფლუქს ეზოფაგიტი, მწვავე გასტრიტი, დუოდენიტი, სიმპტომური ანორექსია.

ემპათიაში ვარაუდობენ, რომ დიაგნოზები გახანგრძლივებული შიმშილობის შემდეგ კვებითი აღდგენითი თერაპიის არაეფექტურ წარმართვასა და შემდგომში ვერნიკეს ენცეფალოპათიის შეუსაბამო მკურნალობასთანაა კავშირში. ასევე, მიიჩნევენ, რომ შიმშილობის გახანგრძლივება ტრამვულ-სტრესული გარემოს ზემოქმედებამ გამოიწვია.

"ყოველივე ერთობლიობაში იწვევს ადამიანის ფსიქო-ფიზიკური ჯანმრთელობის მდგომარეობის თანდათანობით გაუარესებას და მნიშვნელოვანი ზიანის მიყენებას. ამავდროულად, საგანგაშოა ჰიპოპროტეინემია, ჰიპოალბუმინემია, ანემია, საკვების მიუღებლობა, ფსიქო-ფიზიკური გამოფიტვა, ფსიქო-ფიზიკური განლევადობა, კუჭ-ნაწლავის ტრაქტისა და ნერვული სისტემის ორგანული დაზიანება, თანმდევი ფსიქიკური კომპონენტების დამძიმებით. აღნიშნული მაჩვენებლები და წარმოდგენილი დიაგნოზები მიუთითებს ფსიქო-ფიზიკური ჯამრთელობის მდგომარეობის დამძიმებაზე. ამას ემატება არასათანადო მკურნალობა", — აღნიშნავენ ისინი.

მათი განცხადებით, სააკაშვილი 9 სახის მედიკამენტს ან დანამატს ღებულობს და განმარტავენ, პრეპარატების ეფექტის ურთიერთგაძლიერების მექანიზმი, შესაძლოა, მის მდგომარეობას ამძიმებდეს.

"პაციენტი კვლავ ღებულობს ნეიროლეფსიურ პრეპარატს, რაც კორსაკოვის სინდრომის რისკის შემთხვევაში დაუშვებელია. ამასთანავე, კვლავ არ მიმდინარეობს ვერნიკეს ენცეფალოპათიისა და პოლინეიროპათიის პათოგნომური მკურნალობა-დიაგნოსტიკა. შესაბამისად, შეუძლებელია PTSD და ემოციური აშლილობების ეფექტური მკურნალობა. არასწორად წარმართულმა refeeding პროცესმა გამოიწვია მდგომარეობის თანდათანობითი დამძიმება, აღნიშნულმა სიმპტომატიკამ დისპეპსიური მოვლენების სახით გორის სამხედრო ჰოსპიტალშივე იჩინა თავი", — ნათქვამია დასკვნაში.

ცენტრში აცხადებენ, რომ ექსპრეზიდენტი ინტენსიურ თერაპიასა და დამატებით დიაგნოსტიკას საჭიროებს. ასევე, აუცილებელია ნეირო-ფსიქოლოგიური და კუჭ-ნაწლავის ტრაქტის სრულყოფილი გამოკვლევა. ამასთან, მიუთითებენ, რომ ის სასწრაფოდ უნდა იქნას გადაყვანილი მაღალტექნოლოგიურ მულტიპროფილურ კლინიკაში.

"შესაბამისი ზომების არმიღების შემთხვევაში მოსალოდნელია, მდგომარეობის შეუქცევადი გაუარესება — კორსაკოვის სინდრომის თანდათანობითი ჩამოყალიბება (გზა დემენციისაკენ) ცალკეული ორგანოთა სისტემის მხრივ ან პოლი-ორგანული უკმარისობა ფსიქო–ფიზიკური განლევადობა, კახექსია ლეტალური გამოსავალი", — აღნიშნავენ ისინი.

27 აპრილს სახალხო დამცველის ინიციატივით შექმნილი ექიმთა კონსილიუმის წევრმა, ნევროლოგმა, თენგიზ წულაძემ განაცხადა, რომ სააკაშვილს ციხეში ძირითადი მედიკამენტური მკურნალობა უტარდება, თუმცა ეს საკმარისი არაა. ნევროლოგის თქმით, ექსპრეზიდენტი ცილოვანი საკვების მიღებაზე უარს ამბობს, რასაც ცილოვანი შიმშილი მოსდევს. მისივე თქმით, ის ცილები, რომელიც სააკაშვილს არ მიეწოდება, ორგანოებისა და კუნთების დაშლას იწყებს.

28 აპრილს ულტიმატუმის ამოწურვის შემდეგ ექსპრეზიდენტის ოჯახი მთელი ქვეყნის მასშტაბით უწყვეტი აქციები დააანონსა.

ექიმ დეპუტატებს მონახულების მოწოდებით სააკაშვილმა გუშინ, 4 მაისს მიმართა. ექსპრეზიდენტმა განაცხადა, რომ მათთან არანაირ პოლიტიკურ დისკუსიას არ გამართავს და მხოლოდ სიმპტომებზე ესაუბრება. პასუხად, 5 მაისს ხუნდაძემ თქვა, რომ სააკაშვილთან შეხვედრის აზრს ვერ ხედავს და განაცხადა, რომ მან ჯანმრთელობა არა ვინმეს "უყურადღებობით ან უდიერი მოპყრობით", არამედ "საკუთარი სურვილით" გაუარესა.