უკრაინის პრეზიდენტის, ვოლოდიმირ ზელენსკის განცხადებით, აზოვსტალიდან მშვიდობიანი მოქალაქეების ევაკუაცია ოკუპანტების დაბომბვის ფონზე გრძელდება. მისი თქმით, ქარხანაში ამ დრომდე ბევრი ქალი და ბავშვი რჩება.

მიმართვაში ზელენსკიმ თქვა, რომ ქვეყანაში სამედიცინო სერვისებსა და მედიკამენტებზე ხელმისაწვდომობის კატასტროფული ნაკლებობაა. როგორც მან აღნიშნა, ოკუპანტებმა უკრაინაში 400 სამედიცინო დაწესებულება გაანადგურეს ან დააზიანეს.

გაეროს გენერალური მდივნის, ანტონიო გუტერეშის განცხადებით, გუშინ, აზოვსტალის ქარხნიდან 500 ადამიანი ევაკუირება შეძლეს. მისივე თქმით, ყველაფერი უნდა გაკეთდეს იმისთვის, რომ ადამიანები "ამ ჯოჯოხეთიდან გამოიყვანონ".

გუშინ, 5 მაისს ოკუპანტი ქვეყნის პრეზიდენტმა, ვლადიმერ პუტინმა მოითხოვა, რომ კიევმა აზოვსტალში დარჩენილებს იარაღის დაყრის ბრძანება მისცეს.

4 მაისს გავრცელდა ინფორმაცია, რომ რუსი სამხედროები აზოვსტალის ქარხანაში შეიჭრნენ. ამას კრემლი უარყოფს და ამტკიცებს, რომ იქ ხუთშაბათს ჰუმანიტარული დერეფნები ფუნქციონირებდა.

21 აპრილს, მას შემდეგ, რაც სერგეი შოიგუმ ვლადიმერ პუტინს უთხრა, თითქოს მარიუპოლი აიღეს და მხოლოდ აზოვსტალის ინდუსტრიული ზონის შტურმიღა რჩებოდათ, პუტინმა ეს გეგმა დაიწუნა. მან ბლოკადის გაგრძელება მოითხოვა და ამტკიცებდა, ვითომ ეს რუსი ჯარისკაცების ჯანმრთელობასა და სიცოცხლეზე ზრუნვის გამო გადაწყვიტა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში