რუსეთის საგარეო საქმეთა სამინისტროს განცხადებაში ნათქვამია, რომ დანიის საელჩოს შვიდი თანამშრომელი პერსონა ნონ გრატად გამოაცხადეს. დიპლომატებმა ქვეყანა ორი კვირის განმავლობაში უნდა დატოვონ.

სამინისტროს თქმით, გადაწყვეტილების მიღების მიზეზი დანიიდან რუსი დიპლომატების გაძევება და უკრაინისთვის სამხედრო დახმარების მიწოდებაა. რუსეთი ამტკიცებს, რომ დანიის "ღია ანტირუსული პოლიტიკა" სერიოზულ ზიანს აყენებს ორმხრივ ურთიერთობებს.
ამასთანავე, რუსული მხარე იტოვებს უფლებას გადადგას დამატებითი საპასუხო ნაბიჯები კოპენჰაგენის ქმედებებზე, რის შესახებაც მათ მოგვიანებით აცნობებენ.

დანიის საგარეო საქმეთა სამინისტრომ დაადასტურა, რომ ინფორმირებული არიან მოსკოვში მათი საელჩოს ოთხი დიპლომატის და სამი სხვა თანამშრომლის ქვეყნიდან გაძევების შესახებ.

"ეს არის სრულიად გაუმართლებელი და ღრმად პრობლემური გადაწყვეტილება, რომელიც ხაზს უსვამს იმას, რომ რუსეთს აღარ სურს რეალური დიალოგი და დიპლომატია", — განაცხადა დანიის საგარეო საქმეთა მინისტრმა, იეპე კოფოდმა.

ომის დაწყებიდან მეოთხე დღეს დანიის სამეფომ უკრაინას 2 700 ტანკსაწინააღმდეგო იარაღი გადასცა. 5 აპრილს კი, ბუჩაში მშვიდობიანი მოქალაქეების მასობრივ მკვლელობებზე ინფორმაციის გავრცელების შემდეგ 15 რუსი დიპლომატი ქვეყნიდან გააძევა.