უკრაინის შეიარაღებული ძალების გენშტაბის განცხადებით, ოკუპანტებმა ბოლო 24 საათში ლუგანსკსა და დონეცკში ფრონტის ხაზი ვერ გაარღვის. მათი თქმით, ლიმანის, სევეროდონეცკისა და პოპასნაიას ტერიტორიაზე მტრის ქვედანაყოფები შეტევითი ოპერაციების ჩატარებას ცდილობენ, თუმცა წარუმატებლად.

გენერალური შტაბის ცნობით, ზოგიერთმა რუსმა სამხედრომ უარი თქვა შემდგომ საომარ მოქმედებებში მონაწილეობაზე.

"აღმოსავლეთის სამხედრო ოლქის 35-ე სრულ-სამხედრო არმიის 38-ე ცალკეული ბრიგადის რამდენიმე სამხედრო მოსამსახურემ, აღდგენის ზონაში გადაყვანის შემდეგ, უარი თქვა უკრაინაში საომარ მოქმედებებში მონაწილეობაზე მნიშვნელოვანი პერსონალის დანაკარგების გამო", — ნათქვამია განცხადებაში.

მათივე ინფორმაციით, ოკუპანტები გასული 24 საათის განმავლობაში კვლავ აქტიურად ბომბავდნენ უკრაინულ დასახლებებს რაკეტებითა და არტილერიით. კრამატორსკში 6 ადამიანი დაშავდა, დაინგრა სკოლა და საბავშვო ბაღი.

გენშტაბის განცხადებით, ნიკოლაივის მიმართულებით მათ შეუტიეს რუსულ პოზიციებს და გარკვეული დასახლებების დაბრუნება შეძლეს ნიკოლაივისა და ხერსონის რეგიონების საზღვარზე.