ქართული ოცნების თავმჯდომარის, ირაკლი კობახიძის განცხადებით, ყოფილი პრეზიდენტი, მიხეილ სააკაშვილი "სიმულიანტობს" და ცდილობს, ამით "დააღწიოს თავი ციხეს". მისი თქმით, რა ინფორმაციასაც ფლობენ, არ დგას საჭიროება საერთაშორისო ექსპერტებისა და მედიკოსების ჩართულობის.

"ჩამოვიდა, გარისკა და მოხვდა იქ, სადაც იყო მისი ადგილი. ახლა სიმულიანტობს და ცდილობს, სიმულიანტობის ხარჯზე რაღაცნაირად თავი დააღწიოს საპატიმროს. ბუნებრივია, ეს აპრიორი არის გამორიცხულია. აქედანვე შეიძლება მკაფიოდ ითქვას, რომ ვერავითარი სიმულიანტობა, თვითდაზიანება თუ რაიმე მსგავსი, ვერ გახდება, ამას ვამბობ ძალიან მკაფიოდ და ხაზგასმით, ვერ გახდება, მისი ვერც გათავისუფლების, ვერც სხვა ქვეყანაში გადაყვანისა და ვერც შინაპატიმრობის საფუძველი", — ამბობს კობახიძე.

20 აპრილს ექსპრეზიდენტი, მიხეილ სააკაშვილი სასამართლო პროცესზე საუბრობდა, როდესაც განაცხადა, რომ შეუძლოდ გახდა და ექიმის დახმარება ითხოვა. მან მანდატურებს დახმარება სთხოვა, რის შემდეგაც დარბაზიდან გაიყვანეს. სააკაშვილი პროცესზე რამდენიმე წუთში დააბრუნეს.

27 აპრილს სახალხო დამცველის ინიციატივით შექმნილი ექიმთა კონსილიუმის წევრმა, ნევროლოგმა, თენგიზ წულაძემ განაცხადა, რომ სააკაშვილს ციხეში ძირითადი მედიკამენტური მკურნალობა უტარდება, თუმცა ეს საკმარისი არაა. ნევროლოგის თქმით, ექსპრეზიდენტი ცილოვანი საკვების მიღებაზე უარს ამბობს, რასაც ცილოვანი შიმშილი მოსდევს. მისივე თქმით, ის ცილები, რომელიც სააკაშვილს არ მიეწოდება, ორგანოებისა და კუნთების დაშლას იწყებს.

28 აპრილს ულტიმატუმის ამოწურვის შემდეგ ექსპრეზიდენტის ოჯახი მთელი ქვეყნის მასშტაბით უწყვეტი აქციები დააანონსა.

ამავე თემაზე: