მოლდოვის პრეზიდენტი მაია სანდუ აცხადებს, რომ ქვეყანა პესიმისტური სცენარებისთვის მზადაა, თუმცა არეულობის გარდაუვალ საფრთხეს ვერ ხედავენ.

"ჩვენ ვერ ვხედავთ გარდაუვალ საფრთხეს უახლოეს მომავალში, თუმცა რა თქმა უნდა, გვაქვს გეგმები მსგავსი სცენარისთვის, რომლებიც ნაკლებად ოპტიმისტური ან პესიმისტურია", — აცხადებს სანდუ.

მან, ასევე, თქვა, რომ პოლიცია დნესტრისპირეთში სტაბილურობის უზრუნველსაყოფად ყველაფერს აკეთებს.

დღეს, 4 მაისს ევროპული საბჭოს პრეზიდენტმა, შარლ მიშელმა განაცხა, რომ ისინი მოლდოვას სამხედრო აღჭურვილობას გადასცემენ და დაეხმარებიან დეზინფორმაციის წინააღმდეგ ბრძოლაში.

უკრაინაში რუსეთის შეჭრიდან 2 თვის შემდეგ აფეთქებების ხმა დნესტრისპირეთშიც გაისმა. დნესტრისპირეთი მოლდოვის სეპარატისტული რეგიონი, თვითგამოცხადებული რესპუბლიკაა, რომელიც უკრაინას სამხრეთ-დასავლეთით ესაზღვრება. ამჟამად ამ რეგიონს მოლდოვის ხელისუფლება ვერ აკონტროლებს, რუსეთს კი იქ ე.წ. სამშვიდობო ჰყავს.

22 აპრილს აგრესორმა ქვეყანამ განაცხადა, რომ უკრაინაში ომის მეორე ფაზის მიზანი დონბასზე სრული კონტროლი და სამხრეთ უკრაინის დაკავებაა. მათი თქმით, დნესტრისპირეთთან სახმელეთო კავშირი სურთ. ამაზე უკრაინის პრეზიდენტიის უფროსის მრჩეველმა, მიხაილო პოდოლიაკმა აღნიშნა, რომ რუსეთის მადა იზრდება და შემდეგი მოლდოვა იქნება.

26 აპრილს მოლდოვის პრეზიდენტმა თქვა, რომ რეგიონში სხვადასხვა ძალებს შორის დაძაბულობაა და ისინი სიტუაციის დესტაბილიზაციით არიან დაინტერესებული, ეს კი ქვეყანას საფრთხეს უქმნის. მალევე უკრაინის დაზვერვამ განცახადა, რომ რუსეთი დნესტრისპირეთზე სარაკეტო თავდასხმას ამზადებს. ამავე დღეს, რუსეთის სახელწიფო მედიასაშუალებაში ქვეყნდება ინფორმაცია სახელწოდებით — "დნესტრისპირეთის პრეზიდენტის თქმით, აფეთქებების კვალი უკრაინამდე მიდის".

ამავე თემაზე: