"მონახულება მოხდება", — ასე პასუხობს ქართული ოცნების დეპუტატი, სოზარ სუბარი ჟურნალისტის კითხვას, აპირებენ თუ არა ექსპრეზიდენტის, მიხეილ სააკაშვილის მონახულებას.

ის არ აკონკრეტებს, თუ ვინ შევა ქართული ოცნების წევრებისგან ექსპრეზიდენტის სანახავად ციხეში, თუმცა დასძენს, ამაზე ინფორმაცია მალე გახდება ცნობილი. დეპუტატი აქვე აღნიშნავს, რომ თავად მათ შორის არ იქნება.

მმართველი პარტიის კიდევ ერთი დეპუტატი, მიხეილ სარჯველაძე კი ამბობს, რომ შესაძლოა, რომელიმე დეპუტატი სააკაშვილის მონახულებას გეგმავდეს, თუმცა ამაზე ინფორმაციას არ ფლობს.

"თუ საჭიროება იქნება კიდევაც შეიძლება შევიდეთ, თუ არ იქნება საჭიროება თვითმიზნად ამას ბუნებრივია, რომ არავინ დაისახავს", — თქვა მან.

20 აპრილს ექსპრეზიდენტი, მიხეილ სააკაშვილი სასამართლო პროცესზე საუბრობდა, როდესაც განაცხადა, რომ შეუძლოდ გახდა და ექიმის დახმარება ითხოვა. მან მანდატურებს დახმარება სთხოვა, რის შემდეგაც დარბაზიდან გაიყვანეს. სააკაშვილი პროცესზე რამდენიმე წუთში დააბრუნეს.

27 აპრილს სახალხო დამცველის ინიციატივით შექმნილი ექიმთა კონსილიუმის წევრმა, ნევროლოგმა, თენგიზ წულაძემ განაცხადა, რომ სააკაშვილს ციხეში ძირითადი მედიკამენტური მკურნალობა უტარდება, თუმცა ეს საკმარისი არაა. ნევროლოგის თქმით, ექსპრეზიდენტი ცილოვანი საკვების მიღებაზე უარს ამბობს, რასაც ცილოვანი შიმშილი მოსდევს. მისივე თქმით, ის ცილები, რომელიც სააკაშვილს არ მიეწოდება, ორგანოებისა და კუნთების დაშლას იწყებს.

28 აპრილს ულტიმატუმის ამოწურვის შემდეგ ექსპრეზიდენტის ოჯახი მთელი ქვეყნის მასშტაბით უწყვეტი აქციები დააანონსა.

ამავე თემაზე: