დროას ლიდერის, ელენე ხოშტარიას განცხადებით, ანალიზები კარგი აქვს და დღეს უკვე საკვების მიღებაც დაიწყო. ამის შესახებ მან საკუთარ Facebook-ზე დაწერა.

"სისუსტე დავამარცხე, ფეხებში ძალა ვიგრძენი, ანალიზები კარგი მაქვს, კითხვა დავიწყე, "ბასეინში წყალიც ჩამისხეს". დღეს პირველად ვჭამ უკვე საჭმელს. ეს არის ჩემი ელარჯიც, მწვადიც, დედას პურიც, კრუასანიც, სტეიკიც, ღვინოში გამომცხვარი ხორციც, ჩინურიც. დინამიკა იმდენად კარგია, რომ მგონი, მალე გამომწერენ საავადმყოფოდან", — ამბობს ის.

17-დღიანი შიმშილობის შემდეგ, 19 ნოემბერს ელენე ხოშტარიამ შიმშილობა შეწყვიტა. მან განაცხადა, რომ სააკაშვილის გადაყვანა გორის სამხედრო ჰოსპიტალში მისთვის შიმშილობის შეწყვეტის საფუძველია. შიმშილობის შემდგომი რეაბილიტაციისთვის ის ნიუ ჰოსპიტალში გადაიყვანეს. ადგილიდან ხოშტარიამ დაპოსტა, რომ თავს მშვენივრად გრძნობდა და მადლობა გადაუხადა რესპუბლიკური საავადმყოფოს ექიმებს, ვახტანგ კალოიანსა და პარლამენტის ადმინისტრაციას.