საქართველოს ახალგაზრდა იურისტთა ასოციაცია (საია) სტრასბურგის სასამართლოს მიმართავს. ორგანიზაციის განცხადებით, საქმე ეხება მათ წინააღმდეგ განხორციელებულ კოორდინირებულ და პოლიტიკურად მოტივირებულ დევნას, ვანდალიზმს, დაშინებისა და სტიგმატიზაციის კამპანიას.

სარჩელის საფუძველი 2024 წლის მაისში მომხდარი მოვლენებია. ე.წ. გამჭვირვალობის შესახებ კანონის მიღების პარალელურად, საიას ცენტრალური ოფისის შენობას — რომელსაც კულტურული მემკვიდრეობის უძრავი ძეგლის სტატუსი აქვს — თავს დაესხნენ. ფასადზე გამოჩნდა შეურაცხმყოფელი წარწერები ("აგენტები", "მოღალატეები", "ერის მტერი") და შესაბამისი შინაარსის პლაკატები.

როგორც ორგანიზაციაში აღნიშნავენ, ადგილობრივმა უწყებებმა (შსს-მ, გენერალურმა პროკურატურამ და სპეციალურმა საგამოძიებო სამსახურმა) ორი წლის განმავლობაში ვერ უზრუნველყვეს ფაქტზე ეფექტიანი გამოძიება. უშედეგო აღმოჩნდა თბილისის მერიისთვის მიმართვებიც — საიამ მუნიციპალიტეტს რეაგირებისა და წარწერების მოშორების თხოვნით ხუთჯერ მიმართა, თუმცა თითქმის ორწლიანი დუმილის შემდეგ პასუხად მხოლოდ "თბილსერვის ჯგუფის" უარი მიიღო, რომელმაც ძველი შენობისა და ტექნიკის შეუფერებლობის მიზეზით ფასადის გაწმენდაზე უარი განაცხადა.

საია მიიჩნევს, რომ ეს ქმედებები მიზანმიმართულად ემსახურება ორგანიზაციის მუშაობის პარალიზებას, თანამშრომლებისა და მხარდამჭერების დაშინებას, ასევე საზოგადოებრივი ნდობის შერყევას. უფლებადამცველები მიუთითებენ, რომ მსგავსი დევნა და სახელმწიფო უწყებების მხრიდან უმოქმედობა ქვეყანაში ზოგადად ადამიანის უფლებების დაცვის მექანიზმებს უქმნის საფრთხეს.

საიას განცხადება სრულად იხილეთ აქ.