სუს-ის სპეციალური ოპერაციების დეპარტამენტს თამაზ შუბითიძე უხელმძღვანელებს. ახალ თანამდებობაზე დანიშვნამდე შუბითიძე შინაგან საქმეთა სამინისტროს განსაკუთრებულ დავალებათა დეპარტამენტის დირექტორის მოადგილის თანამდებობას იკავებდა.

მას ბოლოს ქონებრივი დეკლარაცია მიმდინარე წლის 28 მაისს აქვს შევსებული. დეკლარაციის თანახმად, 2025 წლის პირველ ექვს თვეში სპეციალური ოპერაციების დეპარტამენტის დირექტორის თანამდებობაზე ჯამში 54 743 ლარის ანაზღაურება მიიღო.

ხოლო განსაკუთრებულ დავალებათა დეპარტამენტის დირექტორის მოადგილის თანამდებობაზე — 57 837 ლარი. 2025 წელს ჯამში შუბითიძემ 112 581 ლარი მიიღო ხელფასის სახით.

უძრავი ქონება

დეკლარაციაში შუბითიძეს 16 მიწის ნაკვეთი უფიქსირდება, თითქმის ყველა — ქარელის მუნიციპალიტეტში, ძირითადად სოფელ საღოლაშენსა და ადმინისტრაციულ ერთეულ ბრეთში. მიწის ნაკვეთების ფასები 500-დან 6000 ლარამდე მერყეობს.

მიწის ნაკვეთების ნაწილი კი მემკვიდრეობით მიღებული 25%-იანი წილებია.

  • საცხოვრებელი და დამხმარე სახლი სოფელ საღოლაშენში, 2,014 კვ.მ მიწის ნაკვეთზე — მიღებულია მემკვიდრეობით, ფლობს 25% წილს;
  • ოთხი შენობა-ნაგებობა სოფელ საღოლაშენში, 2,450 კვ.მ მიწის ნაკვეთზე, მიღებულია მემკვიდრეობით, ფლობს 25% წილს;

მისი მეუღლის, მირანდა ხუციშვილის სახელზე რეგისტრირებულია ორი მიწის ნაკვეთი — ქალაქ გორში (300 კვ.მ) და თბილისში, დიღომში (493 კვ.მ) — ორივე 2025 წელს ჩუქებითაა მიღებული.

მოძრავი ქონება და ხარჯები

მირანდა ხუციშვილის სახელზეა რეგისტრირებული Mazda CX-5, რომელიც 2024 წლის დეკემბერში 17 000 აშშ დოლარად შეიძინეს.

დეკლარაციაში ხარჯებში მითითებულია შვილის სწავლის საფასური — 9200 ლარის ოდენობით.

საჩუქრები და სამეწარმეო საქმიანობა

მირანდა ხუციშვილს დეკლარაციაში უფიქსირდება ორი საჩუქარი მამისგან — მიწის ნაკვეთები, 25 000 და 150 000 ლარის საბაზრო ღირებულებით. ამასთან, 2025 წლის ივნისში მან უსასყიდლოდ გაასხვისა შპს "მირატის" წილი, 50 000 ლარის ღირებულების ხელშეკრულებით — მანამდე კომპანიაში 49%-იანი წილს ფლობდა.

დანაზოგები

დეკლარაციის შევსების მომენტისთვის შუბითიძეს და მისი ოჯახის წევრებს ბანკებში რამდენიმე ანგარიში ჰქონდათ:

  • თამაზ შუბითიძე — თი-ბი-სი ბანკის სახელფასო ანგარიშზე 4453,94 ლარი, ასევე ანაბარზე 3670 ლარი;
  • მირანდა ხუციშვილი — თი-ბი-სი ბანკის მიმდინარე ანგარიშზე 3236,17 ლარი, საქართველოს ბანკის სახელფასო ანგარიშზე 102,26 ლარი და შემნახველ ანგარიშზე 528,2 ევრო.