შინაგან საქმეთა სამინისტროს ინფორმაციით, კრიმინალურ სამყაროსთან დაკავშირებული ძმები ფეიქრიშვილები ჯგუფურად ჩადენილი ძალადობისა და გამოძალვის ბრალდებით არიან დაკავებულები. უწყებამ მათთან ერთად კიდევ ერთი პირის დაკავებაც დაადასტურა.

ძმებს სხვადასხვა საქმეზე ედავებიან. გამოძიების თანახმად, გიორგი ფეიქრიშვილმა ე.წ კრიმინალური მფარველობის სანაცვლოდ დიდი ოდენობით თანხა გადახდა მოსთხოვა მოქალაქეს, წინააღმდეგ შემთხვევაში კი სიცოცხლის მოსპობით დაემუქრა.

რაც შეეხება დავით ფეიქრიშვილს, მას პირად დაცვასთან ერთად ჯგუფური ძალადობის ფაქტზე ედება ბრალი.

"გამოძიებით დადგინდა, რომ გიორგი ფეიქრიშვილმა, მოქალაქე თბილისში მდებარე საცხოვრებელ სახლში მიიყვანა, სადაც მას ე.წ. კრიმინალური მფარველობის სანაცვლოდ დიდი ოდენობით თანხის გადახდა მოსთხოვა, წინააღმდეგ შემთხვევაში კი სიცოცხლის მოსპობით დაემუქრა. სამართალდამცველებმა ბრალდებული პირი თბილისში დააკავეს.

რაც შეეხება მეორე სისხლის სამართლის საქმეს, საგამოძიებო მოქმედებებით დადგინდა, რომ თბილისში, ურთიერთშელაპარაკების ნიადაგზე, დავით ფეიქრიშვილმა და მისმა პირადმა დაცვამ ჯგუფურად იძალადეს ახალგაზრდა მამაკაცზე," — წერს უწყება.

გამოძიება საქართველოს სისხლის სამართლის კოდექსის 181-ე და 126-ე მუხლებით მიმდინარეობს.

ძმები გიორგი და დავით ფეიქრიშვილები არაერთ გახმაურებულ კრიმინალურ საქმეში ფიგურირებენ. შსს-მ ისინი 2016 წლის სექტემბერში, ცეცხლსასროლი იარაღისა და საბრძოლო მასალის უკანონო შეძენა-შენახვა-ტარების ბრალდებით დააკავეს. 2020 წლის იანვარში სუს-მა დააკავა 6 პირი (ხოლო მოგვიანებით ბრალი წარუდგინა ვატო ყიფიანს), რომლებიც ძმების ავტომობილის აფეთქებასა და მათ მკვლელობას გეგმავდნენ. 2023 წლის ნოემბერში კი ფინანსთა სამინისტროს საგამოძიებო სამსახურმა დავით ფეიქრიშვილი კრიპტოვალუტის გადამცვლელ ობიექტზე თავდასხმისა და დიდი ოდენობით თანხის ყაჩაღურად დაუფლების ბრალდებით დააკავა.