"TV პირველის" დამფუძნებელი და მფლობელი ვატო წერეთელი აცხადებს, რომ არხის განვითარების მიზნით საზოგადოებრივ მრჩეველთა საბჭო შეიქმნა, რომელსაც თავად უხელმძღვანელებს და რომელიც მედიის, კულტურისა და საზოგადოებრივი სფეროს წარმომადგენლებს აერთიანებს.

"TV პირველის" საზოგადოებრივ მრჩეველთა საბჭო მედიის, კულტურისა და საზოგადოებრივი სფეროს წარმომადგენლებით დაკომპლექტდა. მის შემადგენლობაში არიან: ჟურნალისტი და მედიის კომუნიკაციის სპეციალისტი დოდო შონავა, იურისტი და უფლებადამცველი გიორგი მშვენიერაძე, პოლიტიკური საკითხების ექსპერტი გია ხუხაშვილი, მედიის მკვლევარი დავით ძიძიშვილი, ჟურნალისტები — ზაალ უდუმაშვილი, ინგა გრიგოლია და თამარ ჯინჭარაძე. ასევე თვითმმართველობის ექსპერტი ირაკლი მელაშვილი და მსახიობი ირაკლი აფაქიძე. საბჭოს ვატო წერეთელი უხელმძღვანელებს. მან საბჭოს "TV პირველის" დირექტორობის ახალ კანდიდატად ლევან ჯორბენაძე წარუდგინა. ჯორბენაძე მანამდე ძლიერი საქართველო ლელოს სტრატკომის ხელმძღვანელი იყო. ის ამ თანამდებობაზე თვეზე მეტია აღარ არის.

"TV პირველის” მთავარი ღირებულებები ყოველთვის იყო დამოუკიდებლობა, სიმართლე და საზოგადოების წინაშე პასუხისმგებლობა.

მაქსიმალური ღიაობა, ტელევიზიის განვითარებასა და ყოველდღიურ ცხოვრებაში საზოგადოების ჩართულობა ჩვენი გუნდის მთავარი გამოწვევაა — ამ გზაზე დგება თანამედროვე, განვითარების შემდგომ ეტაპზე გადასვლისა და ახალი მედიასტანდარტის დანერგვის დრო.

ჩემი და ჩვენი გუნდის გადაწყვეტილებით შეიქმნა "TV პირველის" საზოგადოებრივ მრჩეველთა საბჭო, რომელსაც თავად მე ვუხელმძღვანელებ. საბჭო აერთიანებს მედიის, კულტურისა და საზოგადოებრივი სფეროს ავტორიტეტულ წარმომადგენლებს — ირაკლი მელაშვილს, დოდო შონავას, გიორგი მშვენიერაძეს, გია ხუხაშვილს, დავით ძიძიშვილს, ირაკლი აფაქიძეს, ზაალ უდუმაშვილს, ინგა გრიგოლიას და თამარ ჯინჭარაძეს. ეს ადამიანები ხელს შეუწყობენ "TV პირველში" ახალი იდეების გენერირებას, არხის განვითარებასა და მოქალაქეების აქტიურ ჩართულობას პროცესებში.

პირველ სამუშაო შეხვედრაზე საბჭოს წარვუდგინე დირექტორობის ახალი კანდიდატი — ლევან ჯორბენაძე, რომელიც ყველა იდეის განხორციელებაში დაგვეხმარება.

მჯერა, რომ ეს ცვლილებები მეტი შესაძლებლობებისა და "TV პირველის" განვითარების ახალი ეტაპის დასაწყისია", — წერს ვატო წერეთელი.