ფინანსთა სამინისტროს საგამოძიებო სამსახურმა თბილისში ალკოჰოლური სასმელების უკანონო დამზადების ფაქტი გამოავლინა. გამოძიების ინფორმაციით, ერთ-ერთმა პირმა საკუთარ სახლში, კუსტარული მეთოდით სპირტისა და სხვადასხვა დანამატის შერევით ცნობილი ბრენდების — "სარაჯიშვილისა" და "ასკანელის" ყალბი პროდუქცია დაამზადა. სამართალდამცველებმა საცხოვრებელი სახლიდან ფალსიფიცირებული სასმელის 97 ბოთლი ამოიღეს. მომხდარზე გამოძიება სისხლის სამართლის კოდექსის 197-ე მუხლით მიმდინარეობს, რაც 1-დან 3 წლამდე პატიმრობას ითვალისწინებს.

"საგამოძიებო სამსახურმა ალკოჰოლური სასმელების ფალსიფიკაციის ფაქტი გამოავლინა

საქართველოს ფინანსთა სამინისტროს საგამოძიებო სამსახურის თანამშრომლებმა, ქალაქ თბილისში, ალკოჰოლური სასმელების ფალსიფიკაციის ფაქტი გამოავლინეს და ერთ პირს ბრალი წარუდგინეს.

გამოძიებით დადგინდა, რომ ბრალდებულმა, უკანონო მატერიალური სარგებლის მიღების მიზნით, საკუთარ საცხოვრებელ სახლში, კუსტარულ პირობებში, სპირტისა და სხვადასხვა დანამატის გამოყენებით, დაამზადა SARAJISHVILI-ს, ASKANELI-სა და ASKANELI V.S.O.P-ის ბრენდების ფალსიფიცირებული ალკოჰოლური სასმელი — სულ 97 ბოთლი.

ჩატარებული საგამოძიებო მოქმედებების შედეგად, ამოღებულია უკანონოდ დამზადებული პროდუქცია.

საქმეზე გამოძიება მიმდინარეობს საქართველოს სისხლის სამართლის კოდექსის 197-ე მუხლის პირველი ნაწილით, რაც სასჯელის სახით 1-დან 3 წლამდე ვადით თავისუფლების აღკვეთას ითვალისწინებს", — წერია უწყების განცხადებაში.