პროევროპულ აქციაზე დაკავებული მსახიობი ანდრო ჭიჭინაძე 21-ე სკოლას მხარდაჭერას უცხადებს. მის წერილს ადვოკატი თორნიკე მიგინეიშვილი ავრცელებს.

ის წერს, რომ სკოლა მხოლოდ სასწავლო სივრცე არ არის და იქ ბავშვები წლების განმავლობაში პიროვნებებად ყალიბდებიან და თავისუფალ აზროვნებას სწავლობენ. მისი თქმით, სკოლის მიერ შექმნილი ფასეულობები დანგრევას არ ექვემდებარება. ჭიჭინაძე ასევე აკრიტიკებს ამ დღეებში სკოლასთან დაკავშირებით მიღებულ გადაწყვეტილებებს და ამბობს, რომ სხვადასხვა ხელისუფლების პირობებში სკოლა საკუთარ პოზიციებს ყოველთვის იცავდა. ის სოლიდარობას უცხადებს მოსწავლეებს, მშობლებსა და მასწავლებლებს და მხარს უჭერს მათ მოთხოვნებს სკოლის დასაცავად.

"21-ე საჯარო სკოლა არ არის სივრცე სადაც ბავშვები გარკვეულ ინფორმაციას იღებენ და ბრუნდებიან სახლებში.

21-ე საჯარო სკოლა (ჩემთვის "შისტოი") არის და ყოველთვის იყო ადგილი, სადაც ბავშვები ყალიბდებოდნენ პიროვნებებად, სწავლობდნენ თავისუფალ აზროვნებას და ამ პროცესით იყვნენ და არიან ბედნიერები.

ეს ყველაფერი იმ გადასარევი მასწავლებლების დამსახურებაა, რომლებიც წლებია ამ გარემოს ქმნიან.

ეს ფასეულობები, რომლებიც ამ სკოლამ შექმნა, დანგრევას არ ექვემდებარება.

იმ უპასუხისმგებლობის დეტალებზე არაფერს ვიტყვი, რაც ამ დღეებში გავიგე. ერთადერთის თქმა მინდა, რომ არც ერთი მთავრობის პირობებში ამ სკოლას უკან არაფერზე დაუხევია სხვადასხვა დროს მთავრობების ინტერესების მიუხედავად. ვუერთდები თითოეულ ბავშვს, მშობელს და გამორჩეულ მასწავლებლებს ყველა მათ სურვილში და მოთხოვნაში. მადლობა თითოეულ მათგანს ჩვენი სკოლის დაცვისთვის", — წერს ანდრო ჭიჭინაძე.

21-ე საჯარო სკოლასთან პროტესტი 18 სექტემბერს დაიწყო, მას შემდეგ, რაც მოსწავლეების მშობლებმა გაიგეს, რომ სკოლის შენობა საინჟინრო ექსპერტიზის დასკვნის საფუძველზე ავარიულად შეფასდა და სწავლა უნდა შეჩერებულიყო. მშობლებს ინფორმაცია 17 სექტემბერს, სასწავლო წლის დაწყებიდან მხოლოდ ორ დღეში, მოკლე ტექსტური შეტყობინებით მიაწოდეს. ექსპერტიზის დასკვნა შენობის სრული დემონტაჟის რეკომენდაციას შეიცავდა. ამის გამო 18 სექტემბერს მშობლებმა სკოლის წინ აქცია გამართეს და მოითხოვეს დასკვნის გადამოწმება, ალტერნატიული ექსპერტიზა და მოსწავლეებისთვის ისეთი სივრცის გამოყოფა, სადაც მთელი სკოლა ერთად გააგრძელებდა სწავლას.

22 სექტემბერს უკვე მოსწავლეებმა, მოქმედმა და ყოფილმა მასწავლებლებმა, მშობლებმა და კურსდამთავრებულებმა უფრო ფართო აქცია გამართეს. მათი ძირითადი მოთხოვნები გახდა დამოუკიდებელი კომპლექსური ექსპერტიზა, დემონტაჟამდე შენობის რეაბილიტაციის შესაძლებლობის განხილვა და სწავლისთვის სრულფასოვანი ალტერნატიული სივრცის გამოყოფა.

შეგახსენებთ, რომ მსახიობი ანდრო ჭიჭინაძე 2024 წლის 5 დეკემბერს პროევროპულ აქციაზე დააკავეს. მას 2 წლით თავისუფლების აღკვეთა აქვს მისჯილი. 2025 წლის 3 სექტემბერს თბილისის საქალაქო სასამართლომ ის და მასთან ერთად დაკავებული კიდევ 10 პირი თავდაპირველ, ორგანიზებულ ჯგუფურ ძალადობაში მონაწილეობის ბრალდებაში გაამართლა, თუმცა ბრალი გადააკვალიფიცირა და ჯგუფურ ქმედებაში მონაწილეობისთვის 2 წლით პატიმრობა მიუსაჯა. 2026 წლის 17 აპრილს სააპელაციო სასამართლომ ეს განაჩენი უცვლელად დატოვა.