პრემიერი ირაკლი კობახიძე შვეიცარიის კონფედერაციის ვიცეპრეზიდენტს, საგარეო საქმეთა მინისტრს, ეუთო-ს მოქმედ თავმჯდომარე იგნასიო კასისს შეხვდა. ამის შესახებ ის X-ზე წერს.

მთავრობის ადმინისტრაციის ცნობით, შეხვედრაზე მხარეებმა საქართველოსა და შვეიცარიის კონფედერაციას შორის ურთიერთპატივისცემასა და საერთო ღირებულებებზე დაფუძნებულ თანამშრომლობაზე ისაუბრეს. ხაზი გაესვა პოლიტიკური, ეკონომიკური, ხალხთაშორისი და საპარლამენტო კავშირების განვითარების პოზიტიურ დინამიკას.

"შევხვდი შვეიცარიის ფედერალური საბჭოს ვიცეპრეზიდენტს, ფედერალური საგარეო საქმეთა დეპარტამენტის ხელმძღვანელსა და ეუთოს მოქმედ თავმჯდომარეს, იგნაციო კასისს.

განვიხილეთ საქართველოსა და შვეიცარიას შორის ორმხრივი ურთიერთობები და ჩვენს ქვეყნებს შორის თანამშრომლობის კიდევ უფრო გაღრმავების შესაძლებლობები. ასევე შევეხეთ საქართველოს თანამშრომლობას ეუთოსთან და ორგანიზაციის საქმიანობის ძირითად მიმართულებებში ჩვენი ქვეყნის აქტიურ მონაწილეობას", — წერს კობახიძე.

შეგახსენებთ, რომ 22 სექტემბერს კობახიძემ შეხვედრა გამართა თურქეთის პრეზიდენტ რეჯეფ თაიფ ერდოღანთან. მხარეებმა საქართველო-თურქეთის სტრატეგიული პარტნიორობა და ორმხრივი თანამშრომლობის გაძლიერება განიხილეს.

ამას გარდა, ის შეხვდა ნაურუს პრეზიდენტ დევიდ ადეანგს — ამ შეხვედრის ფარგლებში ხელი მოეწერა საქართველოსა და ნაურუს შორის დიპლომატიური ურთიერთობების დამყარების პროტოკოლს.

გარდა ამისა, 22 სექტემბერს კობახიძემ მონაწილეობა მიიღო "მრავალმხრივი პარტნიორობის სამიტში" და ფინეთის მიერ ორგანიზებულ მაღალი დონის პანელურ დისკუსიაში მშვიდობის საკითხებზე.