სახალხო დამცველის მიერ შექმნილი ექიმთა საბჭოს წევრის, ნევროლოგ თენგიზ წულაძის განცხადებით, ყოფილ პრეზიდენტს, მიხეილ სააკაშვილს მეხსიერების დაქვეითება, წონასწორობის კარგა და სისუსტე აღენიშნება.

ექიმის თქმით, გლდანის ციხის საავადმყოფოში მიხეილ სააკაშვილს ნევროლოგიურ სტატუსს სავარაუდოდ, ყოველ დღე არ აფასებენ. როგორც ის განმარტავს, სწორედ ამის გამო არის მნიშვნელოვანი მრავალპროფილური კლინიკა და მხოლოდ აპარატურის მოწყობა საკმარისი არ არის.

"მას აქვს მეხსიერების დაქვეითება, მას აქვს წონასწორობის კარგვა, რომელიც ახლა განუვითარდა, სისუსტე, ეს არის სწორედ იმ დაავადების არასრული გამოვლინება. მაგრამ გამომდინარე კონტექსტიდან და კრიტერიუმებიდან რამდენიმედან ორს მაინც უნდა აკმაყოფილებდეს და სამს აკმაყოფილებს უკვე, ითვლება, რომ დიაგნოზი კლინიკურია და ასე შეფასდა ეს მდგომარეობა", — თქვა ექიმმა ფორმულას ეთერში.

როგორც წულაძემ აღნიშნა, ეს მდგომარეობა არის B1 ვიტამინის დეფიციტით გამოწვეული. ამასთან ექიმის თქმით, მერყეობს კალიუმის მაჩვენებელიც. თუმცა, მისი ინფორმაციით კალიუმისა და B ჯგუფის ვიტამინის შევსებაზე თავად სააკაშვილი თანახმაა.

გუშინ 17 ნოემბერს სახალხო დამცველის მიერ შექმნილმა ექიმების ჯგუფმა მიხეილ სააკაშვილის ჯანმრთელობის მდგომარეობაზე დასკვნა გამოაქვეყნა. მათი შეფასებით, ექსპრეზიდენტის მდგომარეობა კრიტიკულია და მკურნალობის გაგრძელება რეკომენდებულია ფუნქციურად გამართულ, დიდი გამოცდილების მქონე პოლიპროფილურ ჰოსპიტალში. ექიმების დასკვნის მიხედვით, ამ პირობებს მე-18 დაწესებულების კლინიკა არ აკმაყოფილებს.

სააკაშვილი 49-ე დღეა შიმშილობს. როგორც მისმა ექიმიმმა, ნიკოლოზ ყიფშიძემ გუშინ თქვა, ექსპრეზიდენტი მძიმედ გადაადგილდება, რის გამოც სააკაშვილი პაემნების ოთახში ვერ ჩავიდა და მის სანახავად პალატაში მოუწია ასვლა.