უზენაესმა სასამართლომ ბიზნესმენ ლაშა პაპაშვილის "ყვარლის ბაგასა" და ბიზნესმენ რევაზ ვაშაკიძის კომპანია "ჩირინას" შორის მიმდინარე ე.წ. "რძის სკანდალის" საქმეზე საბოლოო გადაწყვეტილება მიიღო.

BMG-ის ინფორმაციით, სასამართლოს მესამე ინსტანციამ ძალაში დატოვა სააპელაციო სასამართლოს გადაწყვეტილება და კომპანია "ჩირინას" ლაშა პაპაშვილისთვის 1.6 მილიონი ლარის გადახდა დაეკისრა.

რევაზ ვაშაკიძემ BMG-თან საუბარში განაცხადა, რომ უზენაესი სასამართლოს განაჩენი აღსრულებულია და მან პაპაშვილის კომპანიას დაკისრებული სახდელი უკვე გადაუხადა. თუმცა ბიზნესმების განცხადებით, უზენაესი სასამართლოს გადაწყვეტილებას ჯერ პროკურატურაში გაასაჩივრებს, შემდეგ კი, არ გამორიცხავს, რომ სტრასბურგის სასამართლოსაც მიმართოს.

"მე არ ვებრძვი ლაშა პაპაშვილს. ბიზნესში დავა ჩვეულებრივი მოვლენაა, მაგრამ მთავარია სასამართლო იყოს ქვეყანაში დამოუკიდებელი, რომლის გადაწყვეტილებებიც სამართლიანობის და კანონიერების პრინციპებს დაეფუძნება.

ჩვენ ჩვენი ხელშეკრულების არც ერთი პუნქტი არ დაგვირღვევია, მაგრამ თბილისის სასამართლომ არასამართლიანი და არაობიექტური გადაწყვეტილება მიიღო. მან არააკრედიტებული ლაბორატორიის დასკვნა მტკიცებულებად ჩათვალა. ასევე, არასწორად აღებული სინჯებიც მტკიცებულებად ჩათვალა. ამდენად, ჩემი აზრით, სასამართლომ კანონი დაარღვია. შესაბამისად, პრეტენზია მაქვს მოსამართლეებთან, რომლებმაც ეს გადაწყვეტილებები მიიღეს და მიმაჩნია, რომ უნდა გასამართლდნენ. პროკურატურამ უნდა აღძრას საქმე და მათ წინააღმდეგ შესაბამისი ზომები მიიღოს," — განაცხადა რევაზ ვაშაკიძემ BMG-სთან.

კომპანია "ჩირინას" ადვოკატმა, გიორგი გეწაძემ BMG-სთან განმარტა, რომ სტრასბურგის სასამართლოში დავა შესაძლოა საქართველოს სახელმწიფოს წინააღმდეგ წარიმართოს. კომპანია სახელმწიფოს სამართლიანი სასამართლოს უფლებების დარღვევაზე მოედავება.

ლაშა პაპაშვილმა BMG-თან საუბარში განაცხადა, რომ უზენაესმა სასამართლომ მის მიერ მოთხოვნილი თანხის მესამედის ანაზღაურება დააკმაყოფილა.

"ზოგადად, არ მიხარია სასამართლოს დავები და როგორც დამთავრდა, დამთავრდა… ახლა რა აზრის აქვს ამ საკითხზე ან წუწუნს ან საუბარს. როგორც გახსოვთ, თავდაპირველად, თბილისის საქალაქო სასამართლომ 5 მილიონ ლარამდე დააკისრა კომპანია "ჩირინას", მაგრამ შემდეგ საბოლოოდ, ასე დამთავრდა… მოგეხსენებათ, მე გასაჩივრებული მქონდა მეორე ინსტანციის გადაწყვეტილება და ვითხოვდი, სრულ ანაზღაურებას (ანუ 4.7 მილიონ ლარს), მაგრამ ფაქტობრივად, უზენაესმა სასამართლომ ძალაში დატოვა სააპელაციო სასამართლოს გადაწყვეტილება — ჩვენ მიერ მოთხოვნილი თანხის მესამედი დააკმაყოფილა. ვერაფერს ვერ ეშველება. რა კომენტარი უნდა გავაკეთო?!" — თქვა ბიზნესმენმა.

სასამართლო დავა

2020 წელს ლაშა პაპაშვილმა კომპანია "ჩირინას" (ბიუ-ბიუ), რომლისგანაც ქათმის ნაკელს ყიდულობდა — სასამართლოში უჩივლა. პაპაშვილი პრეტენზიით მივიდა "ჩირინასთან", რომ მისმა ნაკელმა საქონელი დაუხოცა და 1,65 მილიონი ლარის ზარალი მიადგა, რაზეც "ჩირინამ" პრეტენზიები არ მიიღო. "ჩირინას" განცხადებით, ის ქათმის ნაკელსს სასუქად ყიდდა და არა საკვებად.

სასამართლოს მასალების მიხედვით, "ყვარლის ბაგის" 1 ძროხა დღეში დაახლოებით 6-7 კილო ქათმის ნაკელს ჭამდა (ნამჯაში არეულს).

თავდაპირველად, რუსთავის სასამართლომ ვერ გამოკვეთა საქონლის დახოცვაში "ჩირინას" ბრალეულობა. სააპელაციომ საქმე ხელახალი განხილვისთვის ისევ რუსთავის სასამართლოში დააბრუნა. 2024 წლის მარტში "ყვარლის ბაგამ" რუსთავის სასამართლოდან სარჩელი უკან გაიხმო, ორ თვეში კი იგივე მოთხოვნებით თბილისის საქალაქო სასამართლოს მიმართა.

ქართული ოცნების ღიად მხარდამჭერმა ბიზნესმენმა, ლაშა პაპიაშვილმა, "ჩირინას" სასამართლო დავა მოუგო და მას 4,7-მილიონიანი ზარალის გადახდა დაეკისრა.

"ჩირინას" მფლობელმა "რადიო თავისუფლებას" განუცხადა, რომ დავის თბილისში გადატანა ცუდად ენიშნა. მისი თქმით, ეჭვი გაუჩნდა, რომ ძმები პაპაშვილები დავის გადასაწყვეტად ხელისუფლებასთან კავშირების გამოყენებას აპირებდნენ.

2024 წლის დეკემბერში თბილისის საქალაქო სასამართლომ "ყვარლის ბაგის" საჩივარი დააკმაყოფილა — "ყვარლის ბაგამ" სასამართლოს წარუდგინა ლაბორატორიული დასკვნები, რომელშიც წერია, რომ ნიმუში, რომელსაც კვლევა ჩაუტარდა, ანტიბიოტიკ ტეტრაციკლინს შეიცავდა. ამ დასკვნაზე დაყრდნობით, თბილისის საქალაქო სასამართლოს მოსამართლემ ჩათვალა, რომ ანტიბიოტიკიანმა ნაკელმა რძეც გააფუჭა და 200-მდე ძროხაც დახოცა, სასამართლომ "ჩირინას" დახოცილი ძროხების საფასური და ახალი ძროხების ყიდვისთვის ბანკიდან აღებული სესხის პროცენტის გადახდაც დააკისრა.

"რადიო თავისუფლების" ცნობით, სასამართლოს მასალებში დევს სურსათის ეროვნული სააგენტოს ოფიციალური წერილიც, რომ ნაკელში აღმოჩენილი ტეტრაციკლინი არ არის აკრძალული ვეტერინარული პრეპარატების სიაში. ამ ანტიბიოტიკს დღემდე იყენებენ ფერმერები. დოკუმენტებით ასევე ჩანს, რომ ტეტრაციკლინით თავად "ყვარლის ბაგის" ვეტერინარიც მკურნალობდა ძროხებს. "ჩირინას" მფლობელი უარყოფს ტეტრაციკლინის გამოყენებას თავის ქათმის ფერმაში და ამბობს, რომ სხვა მედიკამენტს იყენებდა.