დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, ამ დროისთვის კორონავირუსის საწინააღმდეგო ვაქცინის ბუსტერ დოზით აცრილია 7 500-მდე ადამიანი, რომელთაგან 4 000-ზე მეტი 60 წელს გადაცილებულია.

"დღევანდელი რიცხვით ბუსტერზე, უკვე 10 დღეა ეს მექანიზმი მუშაობს, ცოტა მეტი, 7 500-მდე ადამიანია აცრილი და აქედან, დაახლოებით, 4 000-ზე ცოტა მეტი აცრილია 60 წელს ზემოთ მოსახლეობა", — აცხადებს ის.

9 ნოემბერს იმუნიზაციის საბჭომ მიიღო გადაწყვეტილება, რომ ბუსტერ დოზის გაკეთება 18 წლის ზემოთ ყველას შეეძლება. ჯანდაცვის მინისტრის მოადგილის, თამარ გაბუნიას თქმით, ბუსტერ დოზის გასაკეთებლად საჭიროა, მეორე აცრიდან გასული იყოს 6 თვე. ამასთან, მისი თქმით, არის გამონაკლისი, რომელიც 60 წლის ზემოთ ასაკის სინოფარმითა და სინოვაკით აცრილ პირებს შეეხებათ. კერძოდ, გაბუნიას თქმით, ისინი ბუსტერ დოზის მიღებას შეძლებენ მეორე აცრიდან 3 თვეში.

საქართველოში ამ დროისთვის 3 სხვადასხვა ვაქცინაა ხელმისაწვდომი, თუმცა ასტრაზენეკათი აცრა მხოლოდ იმ ადამიანებს შეუძლიათ, ვინც ერთი დოზა უკვე გაიკეთა.

უკვე შესაძლებელია ბუსტერითა და ჩანაცვლებით სარგებლობაც. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.