ქართული ოცნების თავმჯდომარე ირკალი კობახიძე, რომელიც ექსპრეზიდენტ მიხეილ სააკაშვილის ფეიკ შიმშილობაზე საუბრობდა, დღეს მას შიმშილობის შეწყვეტისკენ მოუწოდებს. კობახიძის თქმით, სააკაშვილი დესტრუქციულად იქცევა და მოუწოდებს ქვეყანაც დაასვენოს.

"მოვუწოდებ პირველ რიგში მიხეილ სააკაშვილს, პრაქტიკულად მიწევს სტრასბურგის სასამართლოს მოწოდების გამეორება, რომელსაც ის არ ასრულებს უკვე კვირაზე მეტია, თუ არ ვცდები. კიდევ ერთხელ მოვუწოდებ მას, რომ შეწყვიტოს დესტრუქცია, შეწყვიტოს შიმშილობა და დაასვენოს ეს ქვეყანა. თვითონაც დაისვენებს მე მგონი მინიმუმ 6 წელი სადაც იჯდება", — განაცხადა მმართველი პარტიის თავმჯდომარემ.

ირაკლი კობახიძესა და ქართული ოცნების სხვა მაღალჩინოსნებს არაერთხელ უთქვამთ, რომ სააკაშვილის შიმშილობა ფეიკია.

მიხეილ სააკაშვილზე საუბრისას მან დღეს, ასევე, თქვა, რომ ექსპრეზიდენტის სამოქალაქო კლინიკაში გადაყვანაზე პასუხისმგებლობას ვერ აიღებენ. კობახიძის თქმით, სამოქალაქო საავადმყოფოში გადაყვანის შემთხვევაში უსაფრთხოების სერიოზულ რისკებს ხედავენ.

ექსპრეზიდენტი მიხეილ სააკაშვილი, ამჟამად, გლდანის ციხის საავადმყოფოში იმყოფება. ის მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში 8 ნოემბერს გადაიყვანეს. სააკაშვილი 48-ე დღეა შიმშილობს.

სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.