სალომე ზურაბიშვილმა კობა დავითაშვილი, სიკვდილის შემდეგ, ღირსების მედლით დააჯილდოვა. ადმინისტრაციის ინფორმაციით, ამ ფორმით პრეზიდენტმა კიდევ ერთხელ გამოხატა მადლიერება და პატივისცემა დავითაშვილისადმი, როგორც 7 ნოემბრის მოვლენების მსხვერპლის მიმართ.

"დღეს, 7 ნოემბერს საქართველოს პრეზიდენტი ამ გადაწყვეტილებით და ქართველის ხალხის სახელით, კიდევ ერთხელ გამოხატავს მადლიერებასა და პატივისცემას კობა დავითაშვილის, როგორც 2007 წლის 7 ნოემბრის მსხვერპლის მიმართ, იმ პოლიტიკოსის მიმართ, რომელმაც საკუთარი ჯანმრთელობა და სიცოცხლე შესწირა ქვეყნის მომავლისთვის ბრძოლას და სამართლიანობას!" — ვკითხულობთ განცხადებაში.

ფოტო: პრეზიდენტის ადმინისტრაცია

კობა დავითაშვილი 1999 წლიდან 2016 წლამდე, ოთხი მოწვევის პარლამენტის წევრი იყო. ბოლოს ის დეპუტატად ქართული ოცნების პარტიული სიით აირჩიეს, 2012-2016 წლის მოწვევის პარლამენტში. ბოლო წლების განმავლობაში მისი ჯანმრთელობის მდგომარეობა გაუარესდა. ის 2020 წელს გარდაიცვალა.