ზუგდიდში დღეიდან C ჰეპატიტის მართვის ცენტრი იფუნქციონირებს. ამის შესახებ, ინფორმაციას მთავრობის ადმინისტრაცია ავრცელებს და განმარტავს, რომ C ჰეპატიტის მართვის ცენტრში სერვისების სრული სპექტრი იქნება წარმოდგენილი.

ცენტრი საქართველოს პრემიერ-მინისტრმა გიორგი კვირიკაშვილმა ჯანდაცვის მინისტრ დავით სერგეენკოსა და აშშ-ის ელჩ იან კელისთან ერთად გახსნა.

უწყების ცნობით, ბენეფიციარები სკრინინგს, დიაგნოსტიკას, ექიმის კონსულტაციას, რეგისტრაციასა და მედიკამენტებს ადგილზე, ერთი ფანჯრის პრინციპით მიიღებენ.

საქართველოს პრემიერ-მინისტრის განცხადებით, ცენტრის სერვისებით სარგებლობას ოკუპირებულ ტერიტორიაზე მცხოვრები ნეიტრალური პასპორტების მქონე პირებიც შეძლებენ:

"აშშ-ის მთავრობამ და კომპანია "გილეადმა" დაგვრთეს ნება, ნეიტრალური პასპორტების მქონე პირებმა ამ ცენტრში იმკურნალონ. ზუგდიდი შეირჩა იმიტომ, რომ სამწუხაროდ, ამ რეგიონში C ჰეპატიტის საკმაოდ მაღალი მაჩვენებელია".

C ჰეპატიტის მართვის პირველი ცენტრი თბილისში გაიხსნა.