2026 წლის 30 სექტემბერს "ფრიდრიხ ნაუმანის ფონდმა თავისუფლებისთვის" საქართველოში საქმიანობა შეწყვიტა და თბილისში ოფისი დახურა. ამის შესახებ ინფორმაციას ფონდი ავრცელებს.

ფონდის განცხადების მიხედვით, გადაწყვეტილების მიღება მარტივი არ ყოფილა, თუმცა ის "გარდაუვალი გახდა".

ფრიდრიხ ნაუმანის ფონდი დახურვის მიზეზად საქართველოს ხელისუფლების მიერ დაწესებულ ახალ საგრანტო პირობებს და მათი დაფინანსების განაცხადის უარყოფას ასახელებს.

"საქართველოს ხელისუფლების ქმედებები ფონდს ქვეყანაში საქმიანობის გაგრძელების შესაძლებლობას აღარ აძლევს. წელს ჩვენმა ფონდმა "გრანტების შესახებ" ახალი კანონის ფარგლებში განაცხადი წარადგინა, რათა პროექტების დაფინანსება და პარტნიორ ორგანიზაციებთან თანამშრომლობა გაეგრძელებინა. საქართველოს ხელისუფლებამ მოითხოვა, რომ პროგრამის თითოეული კომპონენტი საქართველოს მთავრობის პრიორიტეტებს დაჰქვემდებარებოდა და ყველა საქმიანობის განხორციელებას შესაბამისი ნებართვები დასჭირვებოდა. ეს პირობები, თავისი არსით, ლიბერალური ფონდისთვის აუცილებელ თავისუფლებას ზღუდავს. ამის მიუხედავად, განაცხადში ყველა შესაძლო გზა განვიხილეთ, რათა საქართველოში საქმიანობის გაგრძელებისა და იმ ადამიანების მხარდაჭერის შესაძლებლობა შეგვენარჩუნებინა, რომლებიც ქვეყნის დემოკრატიული მომავლისთვის მუშაობენ. თუმცა ჩვენი განაცხადი 2026 წლის 28 ივლისს უარყვეს. შესაბამისად, ვეღარ ვხედავთ საქმიანობის გაგრძელების შესაძლებლობას, რომელიც ჩვენს ღირებულებებსა და პრინციპებს შეესაბამება.

ჩვენი ფონდი საქართველოში 2002 წლიდან საქმიანობდა. ამ პერიოდში აქტიურად ვთანამშრომლობდით მრავალ პარტნიორ ორგანიზაციასა და ლიბერალურ მიმართულებასთან დაკავშირებულ პირებთან — თავისუფალი საზოგადოების, საქართველოს ევროპული მომავლისა და საზოგადოებებს შორის მჭიდრო დიალოგის ხელშეწყობისთვის. დიდი ხნის განმავლობაში საქართველო იმედისა და დემოკრატიული პროგრესის სიმბოლო იყო.

ჩვენ კვლავ დავუჭერთ მხარს ყველა ქართველს, რომელიც საკუთარ ქვეყანაში თავისუფალი და დემოკრატიული წესრიგისთვის იბრძვის. მათ ხმას საზღვარგარეთ გავაგონებთ და მხარს დავუჭერთ თავისუფალი და დემოკრატიული მომავლისთვის მუშაობაში.

მადლობას ვუხდით ჩვენს თანამშრომლებს, ყველა პარტნიორსა და მეგობარს, რომლებმაც ჩვენი საქმიანობა შესაძლებელი გახადეს. ბოლო წლებში ბევრ მათგანს სულ უფრო ხშირად უწევდა პირადი რისკების გაწევა, როდესაც ისინი საკუთარ ქვეყანაში დემოკრატიული და თავისუფალი წესრიგის დასაცავად გამოდიოდნენ. შესაბამისად, საქართველოში მიმდინარე პოლიტიკურ მოვლენებს დიდი შეშფოთებით ვადევნებთ თვალს", — წერია განცხადებაში.

შეგახსენებთ, რომ 30 სექტემბრიდან ქვეყანაში მუშაობა შეაჩერა კონრად ადენაუერის ფონდმაც.