ევროკომისიამ უკრაინას €2.9 მილიარდი გამოუყო ქვეყნის ფინანსური საჭიროებების დასაფინანსებლად და საჯარო ადმინისტრაციის ფუნქციონირების შესანარჩუნებლად, მაშინ როცა უკრაინა რუსეთის აგრესიის წინააღმდეგ თავდაცვას განაგრძობს. ამის შესახებ ინფორმაციას ევროკომისია ავრცელებს.

მათი ცნობით, თანხა მოიცავს €800 მილიონს, რომელიც პირველად გაიცა "უკრაინის მხარდაჭერის სესხის" ფარგლებში მოქმედი "უკრაინის მექანიზმის" კომპონენტიდან.

"სანამ უკრაინა რუსეთის აგრესიისგან თავს იცავს, ქვეყანა უკრაინის გეგმის ფარგლებში ყოვლისმომცველი რეფორმების განხორციელებასაც განაგრძობს. დღევანდელი ტრანშით ჩვენ ხელს ვუწყობთ უკრაინის ფინანსური სტაბილურობის დაცვას და მხარს ვუჭერთ ინვესტიციებს, რომლებიც ქვეყნის მომავალ აღდგენას შეუწყობს ხელს. რადგან ევროპული სოლიდარობა კონკრეტულ მხარდაჭერას ნიშნავს. ევროპა უკრაინის გვერდით იქნება იმდენ ხანს, რამდენიც საჭირო იქნება", — განაცხადა ევროკომისიის პრეზიდენტმა ურსულა ფონ დერ ლაიენმა.

ეს "უკრაინის მექანიზმის" ფარგლებში მერვე გადარიცხვაა. "უკრაინის მექანიზმი" ევროკავშირის მთავარი ინსტრუმენტია უკრაინის აღდგენის, რეფორმების დღის წესრიგისა და ევროკავშირში გაწევრიანების პროცესის მხარდასაჭერად. ბოლო გადახდის შემდეგ, "უკრაინის გეგმის" ფარგლებში ევროკავშირის მიერ გაწეული მხარდაჭერის საერთო მოცულობა €32 მილიარდს გადააჭარბებს. ეს თანხა მოიცავს წევრი სახელმწიფოებისა და პარტნიორი ქვეყნების გარე შენატანებს და "უკრაინის მხარდაჭერის სესხიდან" ამ გეგმის ფარგლებში მიმართული თანხებს. პირველად, ამ ტრანშში ასევე შედის 2026 წლისთვის "უკრაინის მხარდაჭერის სესხის" ფარგლებში დამატებით გამოყოფილი €8.35 მილიარდიდან მიღებული თანხა.

ევროკომისია კვლავ სრულად არის ერთგული 2026-2027 წლებში გათვალისწინებული €90-მილიარდიანი „უკრაინის მხარდაჭერის სესხის“ და თავდაპირველი „უკრაინის მექანიზმის“ ფარგლებში დარჩენილი თანხების გაცემის.

"უკრაინის მექანიზმი", რომელიც ევროკავშირის მთავარი ფინანსური მხარდაჭერის ინსტრუმენტია უკრაინისთვის, 2024 წლის 1 მარტს ამოქმედდა და 2024-2027 წლებში უკრაინის მხარდასაჭერად €50 მილიარდზე მეტ გრანტსა და სესხს ითვალისწინებს. ამ თანხაში არ შედის წევრი სახელმწიფოებისა და პარტნიორი ქვეყნების გარე შენატანები და "უკრაინის მხარდაჭერის სესხიდან" მიღებული თანხები. მექანიზმის მიზანია უკრაინის მაკროფინანსური სტაბილურობის, აღდგენისა და მოდერნიზაციის მხარდაჭერა, საჯარო ადმინისტრაციის ფუნქციონირების შენარჩუნება და რეფორმების განხორციელების ხელშეწყობა.

2022 წლიდან ევროკავშირმა და მისმა წევრმა სახელმწიფოებმა უკრაინას საერთო ჯამში €227.4 მილიარდის ოდენობის მხარდაჭერა გაუწიეს, მათ შორის €3.8 მილიარდი გაყინული რუსული აქტივებიდან მიღებული შემოსავალი იყო.