ტელეკომპანია ფორმულას ჟურნალისტის, თამარ ჩიხლაძის განცხადებით, გავრცელებულ ფაილებში აღნიშნული საუბარი ნატა ფერაძესთან აქტივისტის სახლში შედგა და აპირებს, რომ ამ საქმეს სამართლებრივი მსვლელობა მისცეს.

"როგორც ჩანს, თვალთვალი მიდიოდა ტრანსგენდერ ადამიანებზე, როგორც ერთ-ერთ ყველაზე მოწყვლად ჯგუფზე. პანდემია ახალი დაწყებული, ჩემმა მეგობარმა სასულიერო პირებმა გადაწყვიტეს დახმარება ამ ადამიანების საკვებით და მითხრეს, რომ გვინდა, რაც შეიძლება მეტ ადამიანს დავეხმაროთ და იქნებ შენ გქონდეს ინფორმაცია. მე დავუკავშირდი ნატას და ვთხოვე, თუ შეეძლო ამის ორგანიზება. ტელეფონზე გვქონდა ძალიან ხანმოკლე დიალოგი. მესენჯერშიც ორი-სამი კითხვით გავცვალეთ ინფორმაცია. მეც და ნატაც ვფიქრობთ, ასე გვახსოვს, რომ დიალოგის ის ნაწილი, რომელიც არის გაშიფრული სიტყვა-სიტყვით, შედგა ნატა ფერაძესთან სახლში, სადაც მე კონკრეტულად ვუყვებოდი ვინ არიან ეს ადამიანები, რატომ გადაწყვიტეს მათი დახმარება, რადგან მასაც ჰქონდა კითხვის ნიშნები, იყო ძალიან გაკვირვებული და მე უნდა დამერწმუნებინა ის, რომ ძალიან სანდო ადამიანები აპირებდნენ ტრანსგენდერი ადამიანების დახმარებას", — ამბობს ჟურნალისტი.

მისივე თქმით, ეს სისტემური პრობლემაა და აქვს პასუხისმგებლობა, რომ ჰქონდეს შესაბამისი რეაგირება.

"მართლა შოკისმომგვრელი იყო ამ დიალოგის პოვნა ამ ფაილებში. ვფიქრობ, რომ ეს არის სისტემური პრობლემა და მე, როგორც მოქალაქეს, მაქვს პასუხისმგებლობა ამაზე მქონდეს შესაბამისი რეაგირება, ვიცი, რომ ამას სხვა ჟურნალისტებიც გეგმავენ, აუცილებლად მივცემ ამ საქმეს სამართლებრივ მსვლელობას", — თქვა ჩიხლაძემ.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: