აჭარაში კორონავირუსით დედა-შვილი გარდაიცვალა. როგორც ბათუმის საერთაშორისო ჰოსპიტალში On.ge-ს განუცხადეს, 54 წლის დედა გუშინ, 27 აგვისტოს გარდაიცვალა, მისი 31 წლის შვილი კი დღეს.

პაციენტები კლინიკაში 30 ივლისს მოათავსეს. პრესსამსახურის ინფორმაციით, არცერთი მათგანი არ იყო აცრილი.

"თავიდანვე იყო მწვავედ მიმდინარე ფორმა, შემდეგ უფრო გართულდა და ორივე იყო კოვიდრეანიმაციაში ხელოვნური სუნთქვის აპარატზე. სხვადასხვა სახის გართულეები ჰქონდათ, გულის გაჩერების ეპიზოდებით", — აცხადებენ კლინიკაში.

27 აგვისტოს მონაცემებით, საქართველოში კორონავირუსის 4 247 ახალი შემთხვევა დადასტურდა, გამოჯანმრთელდა 3 053, ხოლო გარდაიცვალა — 74 ადამიანი. ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 540 449-ს, მათგან გამოჯანმრთელდა — 476 555, ხოლო ვირუსს ჯამში ემსხვერპლა 7 175 ადამიანი.

საქართველოში 4 სხვადასხვა ვაქცინა: ფაიზერი, სინოფარმი, სინოვაკი და ასტრაზენეკა არის შემოტანილი. აცრა შეუძლია ყველა მსურველს, 16 წელს ზევით. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.

გაიგეთ მეტი: როგორ უნდა მიხვიდეთ ასაცრელად, როცა საზოგადოებრივი ტრანსპორტი შეზღუდულია — მარშრუტები