პარტია მოქალაქეების ერთ-ერთმა ლიდერმა, ლევან იოსელიანმა იურიდიულ საკითხთა კომიტეტზე განაცხადა, რომ ქვეყანაში, სადაც პოლიტიკური მართლმსაჯულების მიმართ კითხვები არ ჩნდება, დეპუტატს დამატებითი პრივილეგია არ სჭირდება და გრძელვადიანად პარლამენტმა უნდა იფიქროს ამ ტიპის იმუნიტეტის მოხსნაზე, თუმცა დღევანდელი კონტექსტის გათვალისწინებით, ეს საჭირო ინიციატივაა.

"ყველას კარგად მოგვეხსენება რატომ მოხდა ეს ჩანაწერი მიშელის დოკუმენტში და ეს ისევ დაკავშირებულია ბატონი მელიასთვის ორგზის იმუნიტეტის მოხსნასთან თავისთავად, ამიტომ ახლა ჩვენ გვიწევს ვიმსჯელოთ 2/3-იანი ზღვარის აწევაზე, რომ ეს პროცესი დავაზღვიოთ სამომავლოდ, რაც საბოლოო ჯამში, შეიძლება ეს არის მოკლევადიანი გადაწყვეტა ამ პრობლემის, მაგრამ მე ჩემს პირად პოზიციას გეტყვით და ვუჭერ მხარს ამ ცვლილებას ამ ეტაპზე, თუმცა პირად პოზიციას გეტყვით, რომ ჩემი გადმოსახედიდან დეპუტატს საერთოდ არ სჭირდება იმუნიტეტი. ნორმალურ დემოკრატიულ ქვეყნებში მას არ სჭირდება არანაირი დაცვა, სადაც რაღაცა ტიპის პოლიტიკურ მართლმსაჯულებაზე თუ კითხვის ნიშანი ჩნდება, იქ არის ასეთი გადაწყვეტები საჭირო, თორემ თუ პოლიტიკური მართლმსაჯულების მიმართ არ არის ქვეყენაში კითხვის ნიშანი, დეპუტატს არ სჭირდება დაცვა, დამატებითი პრივილეგია, ამიტომ მიმაჩნია, რომ გრძელვადიანად უნდა ვიფიქროთ საერთოდ დეპუტატისთვის ასეთი ტიპის იმუნიტეტის მოხსნაზე, თუმცა იმ კონტექსტის გათვალისწინებით, რაშიც დღეს ვიმყოფებით და რა კრიზისსაც გავდივართ, ამ ცვლილების მიღება მიმაჩნია საჭიროდ და სამართლიანად", — ამბობს იოსელიანი.

ქართული ოცნება დეპუტატისთვის იმუნიტეტის მოსახსნელად საჭირო ხმების რაოდენობის 51-დან 90-მდე გაზრდას გეგმავს. ამის შესახებ სათანადო კანონპროექტი პარლამენტში უკვე ინიცირებულია. დღეს, 21 ივნისს იურიდიულ საკითხთა კომიტეტის სხდომაზე ეს კანონპროექტი დაჩქარებული წესით განიხილება.

კანონპროექტის მიხედვით, პარლამენტის წევრის დაკავება ან დაპატიმრება, მისი საცხოვრებელი ან სამუშაო ადგილის, მანქანის ან პირადი გაჩხრეკვა შეიძლება მხოლოდ პარლამენტის წინასწარი თანხმობით, აქ გამონაკლისია დანაშაულზე წასწრების შემთხვევა, რაც პარლამენტს დაუყოვნებლივ უნდა ეცნობოს. კანონპროექტში წერია, რომ თუ პარლამენტი 48 საათის განმავლობაში არ მისცემს თანხმობას, პარლამენტის დაკავებული ან დაპატიმრებული წევრი დაუყოვნებლივ უნდა გათავისუფლდეს.

კანონპროექტის მიხედვით, საგამოძიებო მოქმედებათა ჩატარების შესახებ წინადადება პარლამენტში შეაქვს საქართველოს გენერალურ პროკურორს, ამ წინადადების საფუძვლიანობას 5 დღის ვადაში შეისწავლიან და განიხილავენ კომიტეტები, რომლებიც წერილობით დასკვნას წარუდგენენ ბიუროს. პლენარულ სხდომაზე საკითხის განხილვსი შემდეგ გადაწყვეტილება მიიღება დადგენილებით, პარლამენტის სრული შემადგენლობის 3/5-ის უმრავლესობით.

კანონპროექტში, ასევე, ვკითხულობთ, რომ დეპუტატის დაკავებასა ან დაპატიმრებაზე პარლამენტის მიერ თანხმობის მიცემის შემთხვევაში დაკავებულ ან დაპატიმრებულ პარლამენტის წევრს დაკავების ან დაპატიმრების პერიოდით შეუჩერდება უფლებამოსილება დადგენილებით პარლამენტის სრული შემადგენლობის 3/5-ის უმრავლესობით, სისხლის სამართლის საქმის შეწყვეტის ან სასამართლოს მიერ გამამართლებელი განაჩენის გამოტანის შემთხვევაში კი დეპუტატს პარლამენტის დადგენილებით დაკავების ან დაპატიმრების ვადა ჩაეთვლება პარლამენტის წევრის უფლებამოსილების საერთო ვადაში და მიეცემა ამ დროის შესაბამისი კომპენსაცია.