ნიდერლანდების მთავრობის ცნობით, ქვეყანაში პირველი ბავშვი, რომელმაც სიცოცხლე ევთანაზიით დაასრულა, 1 წლის იყო. ეს პირველი შემთხვევაა 2024 წელს მიღებული კანონის საფუძველზე, რომელიც 12 წლამდე ასაკის, უკურნებელი სენით დაავადებული ბავშვებისთვის ევთანაზიას უშვებს.

გავრცელებული ინფორმაციით, ბავშვი ორსულობის 26-ე კვირას დაიბადა, რამაც სერიოზული ჯანმრთელობის პრობლემები გამოიწვია, მათ შორის თავის ტვინის დაზიანება და მრავალჯერადი ინფექციები, 4 თვის ასაკში კი — სეფსისის განვითარება. 8 თვის ასაკში მას ეპილეფსიის იშვიათი და მძიმე ფორმა — ინფანტილური სპაზმების სინდრომი (ასევე ცნობილი, როგორც ვესტის სინდრომი) და ცერებრული დამბლა დაუდგინდა. ამან ბავშვში ძილის დარღვევა, სუნთქვის პრობლემები, ხველის შეტევები და ყლაპვის დარღვევა გამოიწვია.

ანგარიშში ვკითხულობთ: "მოკლე სიცოცხლის განმავლობაში პაციენტში განვითარება ან გაუმჯობესება საერთოდ არ შეინიშნებოდა. 'ყველაფერი, რაც ადამიანად გვაქცევს' — მოტორული უნარები, ქცევა და პიროვნული თვისებები, მძიმედ იყო დაზიანებული და გაუმჯობესების პერსპექტივა არ არსებობდა. ყველა სამედიცინო თუ არასამედიცინო ჩარევის მიუხედავად, მშობლები და ექიმი ბავშვის მდგომარეობის გაუმჯობესებას ვერ ხედავდნენ და ფიქრობდნენ, რომ ის გაუსაძლისად იტანჯებოდა".

ფოტო: Getty

სამომავლო პერსპექტივებისა და მკურნალობის ვარიანტების განხილვის შემდეგ, მშობლებმა ექიმს ბავშვის სიცოცხლის დასრულება სთხოვეს. ეს იყო პირველი შემთხვევა, როცა ნიდერლანდებში 12 წლამდე ასაკის ადამიანმა სიცოცხლე ევთანაზიით დაასრულა.

ნებაყოფლობითი ევთანაზია — როდესაც სამედიცინო პერსონალი ადამიანის სიცოცხლეს მისივე თხოვნით ასრულებს — ნიდერლანდებში 2002 წლის აპრილში გახდა ლეგალიზებული.

მთავრობის ვებგვერდზე განთავსებული ინფორმაციის თანახმად, არასრულწლოვანებს ევთანაზიის მოთხოვნა 12 წლის ასაკიდან შეუძლიათ, იმ პირობით, თუ მათ უნარი შესწევთ შეაფასონ და გაიაზრონ, რა არის მათთვის საუკეთესო. 12-დან 15 წლამდე ასაკის ბავშვების შემთხვევაში, მშობლის ან მეურვის თანხმობა აუცილებელია. რაც შეეხება 16 ან 17 წლის მოზარდებს, გადაწყვეტილების მიღების პროცესში მშობლებთან ან მეურვეებთან კონსულტაციის გავლა სავალდებულოა, თუმცა მათი უშუალო თანხმობა აღარ მოითხოვება.

2024 წელს უკვე ნებადართული გახდა 12 წლამდე ასაკის ბავშვების ევთანაზიაც, იმ შემთხვევაში, თუ ბავშვი განუკურნებელი სენით არის დაავადებული და იტანჯება ისე, რომ გაუმჯობესების პერსპექტივაც არ აქვს. ასეთ შემთხვევებში ბავშვის სიცოცხლის დასრულების გადაწყვეტილება ექიმსა და მშობლებს ერთობლივად შეუძლიათ მიიღონ.

ასევე იხილეთ: