დილიდან რუსთავში, მესხიშვილის ქუჩაზე, აღსრულების პოლიცია იყო მობილიზებული. 2015 წელს აღებული სესხის გამო სამი შვილის მარტოხელა დედას, ეკა მაღალაშვილს, გამოსახლება ემუქრება.

მაღალაშვილის ადვოკატმა, კახა კუკავამ, NEWS.On.ge-თან საუბრისას განაცხადა, რომ 7 წლის წინ სესხის გადაუხდელობის გამო ბანკმა ბინა აუქციონზე გაიტანა, სადაც ბინა გაგა კილაძემ 24 000 ლარად შეიძინა.

აღსრულების პოლიციის მობილიზებას რუსთავში ხმაური მოჰყვა. მაღალაშვილი "ტვ პირველთან" საუბარში აცხადებდა, რომ ბინა წლების წინ მისმა დედამთილმა და მეუღლემ ბანკში ჩადეს, რის შესახებაც მან არ იცოდა.

"2015 წლიდან მიმდინარეობს ეს საქმე. ჩემმა დედამთილმა და ჩემმა ქმარმა ბინა ჩამიდეს ბანკში და ახლა მიშვებენ გარეთ, მე არ ვიცოდი ნამდვილად...

მარტოხელა დედა ვარ სამი ბავშვით. პატარა ბიჭი არის 14 წლისა და ასე მაგდებენ უმოწყალოდ გარეთ. არსად არ მაქვს წასასვლელი. არ ვიცი, რა უნდა გავაკეთო, არ გავალ სახლიდან, იქ მოვკვდები," — განაცხადა მაღალაშვილმა.

დაპირისპირების შემდეგ მაღალაშვილსა და მევახშეს შორის შეთანხმება შედგა. ადვოკატის განმარტებით, მესაკუთრე თანახმაა, მაღალაშვილს ბინა დაუბრუნოს, თუ ის 45 000 დოლარს გადაიხდის. მარტოხელა, უმუშევარ დედას ამ თანხის გადასახდელად 3 თვე მისცეს.

"ყველაზე მაღალი პროცენტიც რომ აიღო საბანკო სესხი, მაინც ახლოსაც ვერ მიდის ამ თანხასთან," — აცხადებს კახა კუკავა.