წინანდლის მამული, თიბისი კონცეპტის მხარდაჭერით, გამოფენასა და პერფორმანსს — "მეხსიერების ფრაგმენტებს" უმასპინძლებს, სადაც სტუმრებს შესაძლებლობა ექნებათ გაეცნონ გოგი ალექსი-მესხიშვილის, სერგო ფარაჯანოვისა და უტა ბექაიას შემოქმედებას.
გამოფენა 7 მაისს გაიხსნება და ერთ თვეს გაგრძელდება. 7 ივნისიდან კი, ერთი თვით, გამოფენა თიბისი კონცეპტის სივრცეში, მარჯანიშვილის 7 ნომერში გადაინაცვლებს.

მთავარი ხაზი და კონცეფცია — ექსპერიმენტული თეატრის ხასიათი — სხვადასხვა სივცრცეების მონაკვეთებად დატვირთვა. თეატრი, როგორც თემა, მთელ სივრცესთან შინაარსობრივადაც ახლოს არის და ასევე, ბევრი კუთხით გაშლის საშუალებას გვაძლევს: სცენოგრაფია, კოსტიუმები, დეკორაციები, მუსიკა, ლაით არტი და ა.შ. რაც ცოცხალი და თანამედროვე ფორმით იქნება წარმოდგენილი და სტუმრებს დღესასწაულის განწყობას შეუქმნის, — გვიყვება თიბისის წარმომადგენელი.

დაიხაზება სივრცის კონცეპტუალური გეგმა, რომელიც შენობის ნახაზზე იქნება აწყობილი და მაყურებელს საშუალებას მისცემს, თავი წარმოდგენის ნაწილად იგრძნოს და უფრო მკაფიოდ აღიქვას კონცეფცია. ნამუშევრის ფორმით იქნება წარმოდგენილი ექსპოზიციაც. კონცეპტუალური რუკა წარმოდგენას ერთიანად შეკრულ სახეს მისცემს და, ასევე, სასტუმროს, ამფითეატრის, რესტორნისა და სხვა სივრცეების ათვისებას შეუწყობს ხელს.

აკადემიური გამოფენა

სერგო ფარაჯანოვისა და გოგი ალექსი-მესხიშვილის რამდენიმე ნამუშევრის ერთიან სივრცეში წარმოდგენა კიდევ უფრო მკაფიოდ გაუსვამს ხაზს მათი ნამუშევრების თეატრალურ ხასიათს. მათი შემოქმედების ურთიერთკავშირი წარმოქმნის საინტერესო ნარატივს და ორ ძალიან მნიშვნელოვან ხელოვანს ერთი განსაკუთრებული რაკურსით წარმოაჩენს. ფარაჯანოვსა და მესხიშვილს არაეთხელ უმუშავიათ ერთად სხვადასხვა ნამუშევრებზე. ამის ერთ-ერთ მაგალითს წარმოადგენს კინო-ფილმი აშიქ-ქერიბი, რომლის მხატვარიც გ. ალექსი-მესხიშვილია (მან ბერლინის ევროპული კინოს აკადემიიის საუკეთესო მხატვრის ნომინაციაშიც გაიმარჯვა და პრემია ფელიქსი მიიღო). აქედან გამომდინარე, ამ ორი ხელოვანის ნამუშევრების სინთეზი გამორჩეული იქნება.

პერფორმანსი

წინანდლის მამულების პარკის ტერიტორიაზე პარალელურად, ფარაჯანოვის შემოქმედების საფუძველზე, უტა ბექაია გამართავს თეატრალურ წარმოდგენას. გამოფენის გახსნის დღეს სტუმრებს მიეცემათ საშუალება, გახდნენ თეატრალური დადგმის მონაწილეები. მთელ პარკში იქნება წარმოდგენილი რამდენიმე სეტი, რაც დამსწრე საზოგადოებას სადღესასწაულო განწყობას შეუქმნის.