დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, საქართველოში კორონავირუსის შემთხვევების რაოდენობის მხრივ, ქვეყანა "პიკში" აპრილის ბოლოს, მაისის დასაწყისში შევა. ამის შესახებ მან საკოორდინაციო საბჭოს წევრების სხდომის შემდეგ ისაუბრა.

"ყველა მაჩვენებელი ლაპარაკობს იმაზე, რომ ეპიდსიტუაცია გაუარესებულია ქვეყანაში და ალბათ, მოსალოდნელია მისი კიდევ უფრო ზრდა. რასაც ჩვენ ვეყრდნობით, ანუ ჯანმრთელობის გაზომვათა ინსტიტუტის მონაცემებით, ჩვენ სადღაც პიკში უნდა შევიდეთ, აპრილის ბოლოს მაისის პირველი ორი კვირის განმავლობაში", — თქვა მან.

გამყრელიძის თქმით, ეს პიკი არ იქნება ისეთი, როგორიც ნოემბერ-დეკემბრის პერიოდში.

საკოორდინაციო საბჭოს გადაწყვეტილებით, კომენდანტის საათი ისევ ძალაში რჩება. გარდა ამისა, ძალაში რჩება შაბათ-კვირას კვების ობიექტებისთვის დაწესებული შეზღუდვა. ღიბრაძემ აღნიშნა, რომ გამკაცრდება იზოლაციაში მყოფი პირების, მათი კონტაქტებისა და ქვეყანაში შემომსვლელების თვითიზოლაციის კონტროლი. ასევე, პირბადის ტარების წესის დაცვა.