რიონის ხეობის აქტივისტი, ვარლამ გოლეთიანი ამბობს, რომ მათ პირობებთან დაკავშირებით პრემიერთან განხილვა დღესვე იქნება, ხოლო პასუხი პარასკევს არ გადაცდება.

ვარლამ გოლეთიანმა 20 აპრილს ფეისბუქლაივის დროს განაცხადა, რომ ხელისუფლებისთვის მიცემული გონივრული ვადა იწურება. დღეს უკვე მან ჟურნალისტებთან აღნიშნავს, რომ გუბერნატორი დაუკავშირდა და აუხსნა, რომ პრემიერის იზოლაციიდან გამოსვლის შემდეგ, ვერ მოახერხეს საკითხი მასთან გაევლოთ.

"დღესაც რწმუნებულსაც დავუკავშირდი და ვუთხარი, რომ თუკი ამას დაემატება კოვიდიდან გამომდინარე შეზღუდვები ან აიკრძალება საქალაქთაშორისო გადაადგილება და ადამიანებს საშუალება აღარ ექნებათ, ჩვენამდე მოვიდნენ ან თავისუფლად დავგეგმოთ პროტესტი, ეს გააჩენს განცდას, რომ ხელისუფლებამ გაწელა დრო შეგნებულად, შემდეგ გამოიყენა კოვიდის ფაქტორი", — განაცხადა გოლეთიანმა.

რიონის ხეობის აქტივისტები ხელისუფლების მხრიდან პირობების შესრულებას ელიან, კერძოდ მიეცეთ ნამოხვანისკენ გადაადგილებისა და იმავე სივრცეში პროტესტის გაგრძელების საშუალება. ამასთან, ადგილობრივები მოითხოვენ, რომ კომპანია ENKA-მ ჰესის მოსამზადებელი სამუშაოები შეაჩეროს.

"მათ თქვეს, რომ დღესვე მოხდება განხილვა პრემიერთან ამ საკითხის და პარასკევს არ გადაცილდება მათგან პასუხი. ჩვენ, რა თქმა უნდა, დაველოდებით პარასკევ დღეს. მკაფიოდ გვინდა ვთქვათ, რომ დრო არ მუშაობს მათზე და განწყობები საზოგადოებაში იქმნება ისეთი, რომ ხელოვნურად იწელება პროცესი", — თქვა გოლეთიანმა.

რიონის ხეობის აქტივისტები მთავრობის წარმომადგენლებს ქუთაისის მერიაში 16 აპრილს შეხვდნენ. ადგილობრივებმა შეხვედრაზე სამი პირობა დააყენეს, რათა გაჩნდეს სივრცე შემდგომი დიალოგისთვის.

ამავე თემაზე: