ეკონომიკის მინისტრის, ნათია თურნავას თქმით, ქუჩებში პირველი ტურისტები გამოჩნდნენ. მისივე თქმით, ამის ფონზე ტურისტული სექტორის აღდგენაც ეტაპობრივად მიმდინარეობს.

"დიდი გამოწვევაა პანდემიის მესამე ტალღა, რომელშიც ვიმყოფებით, მაგრამ საკმაოდ დიდი ენერგია დაიხარჯა უსაფრთხოების პროტოკოლებისა და ზომების დანერგვაში. ქუჩებში გამოჩდნენ პირველი ტურისტები და რაც ძალიან მნიშვნელოვანია, ვიზეარმა — ჩვენმა ცნობილმა პარტნიორმა და დაბალბიუჯეტიანმა ავიაკომპანიამ ფრენები ქუთაისის საერთაშორისო აეროპორტში უკვე აღადგინა. პირველი რეისი უკვე შესრულდა ვილნიუსიდან, უახლოეს პერიოდში შესრულდება ფრენები ვარშავა-ქუთაისი — ქუთაისი-ვარშავის მიმართულებით", — განაცხადა თურნავამ.

მინისტრის ინფორმაციით, კიდევ რამდენიმე მიმართულების აღდგენა კომპანიის მიერ მაისიდან იგეგმება, მათ შორის, რიგიდან და დორტმუნდიდან. მისივე თქმით, ეტაპობრივად აღდგება სხვა მიმართულებებიც.

შეგახსენებთ, რომ მარტში საერთაშორისო ვიზიტები 73%-ით შემცირდა. რაც შეეხება პირველ კვარტალს, იანვარ-მარტში უცხოური ვიზიტების 88%-იანი კლება დაფიქსირდა — მიმდინარე წლის პირველ სამ თვეში საქართველოში სულ 130 188 უცხოური ვიზიტი განხორციელდა.