თემირლან მაჩალიკაშვილის მამა, მალხაზ მაჩალიკაშვილი ამბობს, რომ მისთვის და მისი მეგობრებისთვის შეურაცხმყოფელი იყო, რაც ქუთაისის თეატრის მიმდებარე ტერიტორიაზე მოხდა. მისივე თქმით, ის აქციიდან არ გაუძევებიათ და ამბობს, რომ სიტუაციას განერიდა.

"დიახ, ეს იყო ჩემთვის და ჩემი მეგობრებისთვის შეურაცხმყოფელი, რაც მოხდა ქუთაისის თეატრის მიმდებარე ტერიტორიაზე, სადაც ამ ინციდენტს ასობით ადამიანი აკვირდებოდა, მაგრამ ხმა არავის ამოუღია იმ მომენტში.

ახლა რაც შეეხება ვარლამ გოლეთიანის განცხადებას, იძულებული ვხდები ვუპასუხო. ჩემი პატივისცემის მიუხედავად, ყველა იმ ახალგაზრდას, ვინც სამართლიანობისა და თავისი ქვეყნის კეთილდღეობისთვის იბრძვის. განცხადებაში ითქვა, რომ მაჩალიკაშვილი აქციიდან გააძევეს. ჩემთვის ესეც შეურაცხმყოფელია. მაჩალიკაშვილი არავის მისცემს უფლებას ვინმეს, რომ საიდანმე გააძევონ. მე მგონი მაგისი ძალა შემწევს. მაჩალიკაშვილი გაერიდა იქაურობას თვითონ, რომ მიხვდა რაშიც იყო საქმე, რომ მიხვდა პროვოკაციას უმზადებდნენ, რომ მიხვდა მაჩალიკაშვილი მათვის არასასურველი სტუმარი იყო.

და ბოლოს ეს ჩემთვის პირველი შეურაცხყოფა არ არის და არც ახალი ამბავი. ამ 4-წლიან ჯოჯოხეთურ გზაზე, მე აქეთ გიხდით ბოდიშს, თუ ჩემი ჩამოსვლით პრობლემები შეგიქმენით და თხოვნა მექნება ამ თემაზე არავინ ისაუბროს მეტი", — წერს მაჩალიკაშვილი ფეისბუქში.

ნამახვანჰესის აშენების მოწინააღმდეგე აქტივისტი და მოძრაობა რიონის ხეობის გადარჩენისთვის ლიდერი, ვარლამ გოლეთიანი მალხაზ მაჩალიკაშვილის აქციიდან გაძევებასთან დაკავშირებით გავრცელებულ ინფორმაციაზე აცხადებს, რომ მათ ამასთან არანაირი კავშირი არ აქვთ.

მისივე თქმით, ამის შემდეგ ისინი მალხაზ მაჩალიკაშვილსაც დაუკავშირდნენ და თავიანთი პოზიცია გააცნეს.

გოლეთიანმა, ასევე, აღნიშნა, რომ აქციაზე სხვადასხვა შეხედულების ძალიან ბევრი ადამიანი მოდის, რისი კონტროლიც მათთვის შეუძლებელია.