დაავადებათა კონტროლის ეროვნული ცენტრის ცნობით, სააღდგომო არდადეგების გამო, 30 აპრილიდან სამი მაისის პერიოდში ვაქცინაცია შეჩერდება.

"გარკვეული ტექნიკური შეზღუდვები დაკავშირებულია 30.04-3.05-ის პერიოდში ვაქცინაციის შეჩერებასთან, სააღდგომო არდადეგების გამო.

ყველა იმ პირისთვის, ვინც პფაიზერის ვაქცინის პირველი დოზა მიიღო, ვაქცინის მეორე დოზა დარეზერვებულია. რეგისტრაციის ტექნიკური სირთულის დასაძლევად ყველაფერი კეთდება. ვაქცინის მეორე დოზა ყველა თქვენგანისთვის დრულად და რეკომენდებული ვადების დაცვით იქნება ხელმისაწვდომი", — აცხადებენ NCDC-ში.

მათივე ინფორმაციით, პფაიზერის კოვიდსაწინააღმდეგო ვაქცინის მეორე დოზის მისაღებად რეგისტრაცია წარმატებით 8 000-ზე მეტმა ადამიანმა გაიარა, რომელთაც ამ ვაქცინის პირველი დოზა უკვე მიღებული აქვს.

NCDC-ის ცნობით, ბოლო 24 საათში კორონავირუსის საწინააღმდეგო ვაქცინით 1 237 ადამიანი აიცრა. 17 აპრილის მონაცემებით კი, ვაქცინა სულ 27 654-მა მოქალაქემ გაიკეთა.

საქართველოში Covid-19-ის საწინააღმდეგო აცრა, ჯერჯერობით, ორი — AstraZeneca-სა და Pfizer-ის ვაქცინით არის შესაძლებელი.