დაავადებათა კონტროლის ეროვნული ცენტრის ცნობით, ბოლო 24 საათში კორონავირუსის საწინააღმდეგო ვაქცინით 1 237 ადამიანი აიცრა. 17 აპრილის მონაცემებით კი, ვაქცინა სულ 27 654-მა მოქალაქემ გაიკეთა.

საქართველოში Covid-19-ის საწინააღმდეგო აცრა, ჯერჯერობით, ორი — AstraZeneca-სა და Pfizer-ის ვაქცინით არის შესაძლებელი.

ქვეყანაში მედპერსონალის ვაქცინაცია AstraZeneca-ს ვაქცინით 15 მარტიდან დაიწყო, ხოლო ვაქცინაციის პროცესში 65 წელს ზევით მოქალაქეები 25 მარტიდან ჩაერთვნენ. 55 წლის ზევით ასაკის მოქალაქეებისთვის ვაქცინაციის პროცესში ჩართვა 2 აპრილიდან გახდა შესაძლებელი.

Pfizer-ის ვაქცინის 29 250 დოზა საქართველოში 25 მარტს ჩამოიტანეს. ხოლო ჩინური ვაქცინა სინოფარმი ქვეყანამ 3 აპრილს მიიღო.

გარდა ამისა, 8 აპრილს ექსპერტების საბჭომ სამინისტროს და დაავადებათა კონტროლის ცენტრის თანამშრომლებთან ერთად მიიღო გადაწყვეტილება, რომ AstraZeneca-ს ვაქცინით ვაქცინაციის პროგრამა მხოლოდ 55 წლის ზემოთ პირებისთვის გაგრძელდება.