მცირე დაპირისპირება იყო აქციის მონაწილეებსა და პოლიციას შორის ქუთაისის სამხარეო პოლიციის შენობასთან. ადგილზე შეკრებილები იმ 6 ადამიანის დაკავებას აპროტესტებენ, რომლებიც გუმათში ნამახვანჰესის საწინააღმდეგო აქციაზე ჯგუფური ძალადობისა და მასში მონაწილეობის ბრალდებით დააკავეს.

მცირე შეხლა-შემოხვლა მას შემდეგ დაიწყო, რაც სამმართველოს ეზო პოლიციის რამდენიმე მანქანამ დატოვა.

ისინი დაკავებულების გათავისუფლებას მოითხოვენ. ამ წუთებში კი ისინი ქუთაისის საქალაქო სასამართლოსკენ მსვლელობას მართავენ.

გუმათჰესის დასახლებაში, ნამახვანჰესის მშენებლობის საწინააღმდეგო აქციაზე, ჯგუფური ძალადობისა და მასში მონაწილეობის ბრალდებით ექვსი ადამიანი 15 აპრილს დააკავეს. ბრალდებულები გვიან ღამით, ქალაქ ბათუმში დააკავეს.

არსებული ინფორმაციით, დაკავებულებს შორის არიან ძმები, ფირუზ და რევაზ წულუკიძეები. ასევე, ოთხი ადამიანი — 1997 წელს დაბადებული თ.ჭ. 1995 წელს დაბადებული თ.ჭ. 1999 წელს დაბადებული გ.ჭ. და 2000 წელს დაბადებულ ი.ჭ.

უწყების ცნობით, დაკავებულებმა 12 აპრილს გუმათჰესის დასახლებაში მიმდინარე საპროტესტო აქციაზე ჯგუფურად იძალადეს და ფიზიკური დაზიანებები მიაყენეს აქციაზე მყოფ სამ პირს. ასევე, დააზიანეს ერთ-ერთი დაზარალებულის კუთვნილი ავტომანქანა.

გამოძიება სისხლის სამართლის კოდექსის 225-ე მუხლით მიმდინარეობს. დანაშაული 4 დან 6 წლამდე ვადით თავისუფლების აღკვეთას ითვალისწინებს.