საქართველოს შინაგან საქმეთა სამინისტროს ინფორმაციით, თბილისში, საქართველოს ბანკზე თავდამსხმელს მძევლად 7 ადამიანი ჰყავდა, რომლებიც პოლიციასთან მოლაპარაკებების შემდეგ, ეტაპობრივად გაათავისუფლა. უწყებაში ამბობენ, რომ 28 წლის პირი დაკავებულია და მას ბრალად ედება მძევლად ხელში ჩაგდება და ცეცხლსასროლი იარაღის მართლსაწინააღმდეგო შენახვა-ტარება. კვლავ უცნობია, რა მოთხოვნები ჰქონდა თავდამსხმელს.

"შეიარაღებული ნ.წ. თბილისში, დუშეთის ქუჩაზე მდებარე საქართველოს ბანკის ფილიალში დღის პირველ ნახევარში შეიჭრა და 7 ადამიანი მძევლად აიყვანა. ადგილზე დაუყოვნებლივ მოხდა პოლიციის შესაბამისი დანაყოფების მობილიზება და დაიწყო ოპერატიულ-საგამოძიებო ღონისძიებები. შინაგან საქმეთა სამინისტროს წარმომადგენლებსა და თავდამსხმელს შორის განხორციელებული მოლაპარაკებების შედეგად, ბრალდებულმა მძევლად აყვანილი ადამიანები ეტაპობრივად გაათავისუფლა, რის შემდეგაც სამართალდამცველებმა ნ.წ. ადგილზე დააკავეს. მომხდარის შედეგად არავინ დაშავებულა", — აცხადებენ უწყებაში.

გამოძიება საქართველოს სისხლის სამართლის კოდექსის 144-ე მუხლის მე-2 ნაწილის "გ" ქვეპუნქტით და 236-ე მუხლის მე-3 და მე-4 ნაწილით მიმდინარეობს, რაც გულისხმობს ორი ან მეტი პირის მძევლად ხელში ჩაგდების და ცეცხლსასროლი იარაღის მართლსაწინააღმდეგო შენახვა-ტარებას.

16 აპრილს, დაახლოებით 13:15 საათზე ცნობილი გახდა, რომ ავლაბარში, საქართველოს ბანკის შენობაში შეიარაღებული პირი შეიჭრა. საშუალოდ ერთსათიანი სპეცოპერაციის შემდეგ, თბილისის საპატრულო პოლიციის დეპარტამენტის ხელმძღვანელმა, ვაჟა სირაძემ თქვა, რომ თავდამსხმელი დაკავებულია და მძევლები გაათავისუფლეს.