შრომის ინსპექციამ თბილისში, კოსტავას ქუჩაზე ბარი ოთახი დალუქა. მათი ინფორმაციით, ობიექტი პირველ აპრილს დაჯარიმდა, რის შემდეგაც სახელი შეიცვალა და ეკონომიკური საქმიანობა იმავე მისამართზე გააგრძელა.

"აღნიშნულ მისამართზე შრომის ინსპექციამ 1-ლ აპრილს შპს მარგი დააჯარიმა, რის შემდეგაც იურიდიული პირის დასახელება შეიცვალა და იგივე მისამართზე საქმიანობა შპს ოცნება 2-მა გააგრძელა, რომელიც 7 აპრილს დაჯარიმდა. სამართალდარღვევის სქემით მოქმედი, ერთსა და იმავე მისამართზე საქმიანობის განმახორციელებელი სამი იურიდიული პირი ჯამში 30 000 ლარით დაჯარიმდა.

უკვე დღეს მთავარი შრომის ინსპექტორის ბრძანების საფუძველზე, ობიექტზე მესამე პირთა შესვლა შეიზღუდა და მთავრობის 322 დადგენილების განმეორებით დარღვევის გამო, შპს ოცნება 2-ის მასალები შინაგან საქმეთა სამინისტროს გადაეგზავნა", — აცხადებენ უწყებაში.

10 აპრილს ტელეკომპანია ფორმულამ გაავრცელა ინფორმაცია, რომ კომენდანტის საათის დროს თბილისში, დახურული წვეულებები იმართება. შაბათის ფორმულას სიუჟეტში მოხვდა ბარი ოთახიც.

ეს არ არის პირველი შემთხვევა, როცა შრომის ინსპექციამ ობიექტები დააჯარიმა. შრომის ინსპექციის უფროსის, ბექა ფერაძის ინფორმაციით, ფართომასშტაბიანი, გასართობი ღონისძიების ორგანიზებისთვის 11 აპრილს დააჯარიმეს ფიზიკური და იურიდიული პირები, ჯამში 22 000 ლარით. უწყება, საპატრულო და კრიმინალურ პოლიციასთან ერთად, ბერი გაბრიელ სალოსის ქუჩაზე მდებარე ფართში 10-11 აპრილის ღამით შევიდა.