სამი არასამთავრობო ორგანიზაცია — სოციალური სამართლიანობის ცენტრი, საია და მწვანე ალტერნატივა — მოუწოდებს შინაგან საქმეთა სამინისტროს, რომ ნამოხვანში აქციის მონაწილეებს შეკრების გაგრძელების შესაძლებლობა მისცეს.

გარდა ამისა, არასამთავრობო ორგანიზაციები მოუწოდებენ მთავრობას უარი თქვას ნამახვანჰესის მშენებლობის გაგრძელების "უკანონო, რეპრესიულ ფორმებზე" და პროცესი დიალოგის ფორმატში დააბრუნოს.

სოციალური სამართლიანობის ცენტრი (ყოფილი EMC), საია და მწვანე ალტერნატივა ეხმაურებიან რიონის ხეობაში გუშინ, 11 აპრილს განვითარებულ მოვლენებს, რამაც მათი შეფასებით, უხეშად და დაუსაბუთებლად შეზღუდა ნამახვანჰესის წინააღმდეგ პროტესტის მონაწილეთა შეკრებისა და გამოხატვის თავისუფლება. ამასთან, ისინი მიიჩნევენ, რომ უკანასკნელ დღეებში ხელისუფლების მიერ გატარებულმა საპოლიციო მოქმედებამ მძიმე და უფლებაშემლახავი ფორმები მიიღო.

11 აპრილს რიონის ხეობაში პოლიციამ დაშალა სოფელ ნამოხვანში რიონის ხეობის მცველების კარვები, რომელიც პროტესტის ერთ-ერთი მონაწილის მიწაზე იდგა. უწყებაში ეს რიონის წყლის დონის მატების გამო აქციის მონაწილეთა სიცოცხლისა და ჯანმრთელობის დაცვის მოტივით ახსნეს. აქტივისტი, ვარლამ გოლეთიანი აცხადებს, რომ წყლის დონის მატებასთან კარვების დაშლა არაფერ კავშირშია. მისი თქმით, იქ, სადაც კარვებია განთავსებული, წყლის დონე არ იმატებს იმ ზღვრამდე, რომ ამ პროცესს ხელი შეუშალოს.

სოციალური სამართლიანობის ცენტრი აცხადებს, რომ ადგილზე სამინისტროს წარმომადგენლების მიერ კარვების დაშლის საფუძვლად სახელდებოდა მიმდინარე სამძებრო-სამაშველო სამუშაოების ხელშეშლა, ასევე ადგილობრივების არასანდო ქცევა და შედეგად, რიონში თავის დახრჩობის რისკები.

არასამთავრობო ორგანიზაციები მიიჩნევენ, რომ შინაგან საქმეთა სამინისტროს ქმედებები ართანმიმდევრულია და მიზნად მშვიდობიანი პროტესტის ხელშეშლას ისახავს მიზნად.

"აღნიშნულზე ასევე მიუთითებს რიონის ხეობის მცველების მიერ პოლიციისადმი არაერთხელ გაჟღერებული მიმართვა, არსებული კარვების აღების სანაცვლოდ მიეცათ მათთვის უშუალოდ სოფელ ნამოხვანში, ალტერნატიულ ტერიტორიაზე კარვების გაშლის შესაძლებლობა, რაც სრულიად დაუსაბუთებლად უარყოფილი იქნა სამინისტროს მხრიდან. საბოლოოდ, პროტესტის მონაწილეები იძულებული გახდნენ დაეტოვებინათ სოფელ ნამოხვანში მათი პროტესტის ადგილი და გადასულიყვნენ სოფელ გუმათთან შეკრებილებთან. აღსანიშნავია, რომ 11 აპრილს გადაადგილების შეზღუდვა უშუალოდ ხეობის მცველების გარდა, შეეხოთ მედიის წარმომადგენლებსაც", — აღნიშნულია არასამთავრობო ორგანიზაციების განცხადებაში.

ორგანიზაციები აცხადებენ, რომ 3 აპრილიდან მოვლენები ვითარდება შსს-ს მიერ გაძლიერებული საპოლიციო კონტროლის ფონზე, რა დროსაც პროტესტის მხარდამჭერებს და ადგილობრივ მოსახლეობას, შეზღუდული აქვს ხეობაში გადაადგილების თავისუფლება.