საქართველოს კულტურის, სპორტისა და ახალგაზრდობის მინისტრის, თეა წულუკიანის განცხადებით, მადლობას უხდის თავისუფლებისთვის მებრძოლ ქალებსა და კაცებს. ამის შესახებ მან 9 აპრილის მემორიალთან განაცხადა.

"დღეს ჩვენ მადლობას ვეუბნებით იმ გოგოებს, ქალებს, კაცებს, საქართველოს შვილებს, ვინც ჩვენ თავისუფლება გვაჩუქა და 9 აპრილს, ამ სისხლიან ღამეს, როდესაც რუსის ჯარმა, რომელიც დღესაც ისევ ჩვენს ტერიტორიაზეა და ოკუპაციას ახორციელებს, დახოცა თავისუფლებისთვის მებრძოლი ჩვენი ქვეყნის შვილები. სიმბოლურად, ჩვენი დიდი სისტემიდან, კულტურის, სპორტისა და ახალგაზრდობის სამინისტროდან დღეს მადლობას ვუცხადებთ სწორედ თავისუფლებისთვის მებრძოლ ქალებსა და კაცებს, ქალი სპორტსმენები, წარმატებული ქალები, ვინც დამოუკიდებელი საქართველოს სახელისთვის იბრძვის საერთაშორისო ასპარეზზე, ბავშვებს და ჩვენი ფოლკლორის წარმომადგენლებს, ვინც ასევე დღემდე მოიტანა ჩვენი ეროვნული იდენტობა. სხვადასხვა ასაკის და სხვადასხვა თაობის წარმომადგენლებს, მათ, ვინც შეინარჩუნეს ქართული სიმღერა, ქართული ცეკვა, ფოლკლორი და სულ ახლახანს ასევე ღირსეულად დაემშვიდობნენ ანზორ ერქომაიშვილს", — თქვა წულუკიანმა.

9 აპრილის ტრაგედიიდან 32 წელი გავიდა. 1989 წლის 4 აპრილს სეპარატიზმისა და მოსკოვის ანტიქართული პოლიტიკის წინააღმდეგ მშვიდობიანი აქციები დაიწყო, რომელიც მალევე დამოუკიდებლობის მოთხოვნაში გადაიზარდა. 9 აპრილს, გამთენიას რუსულმა არმიამ რუსთაველის გამზირზე შეკრებილი ხალხის დარბევა დაიწყო. მშვიდობიან, ხელაწეულ დემონსტრანტებს მომწამლავი ქიმიური საშუალებები, ცეცხლსასროლი იარაღი, სასანგრე ბარები, ჯავშანტრანსპორტიორები და ტანკები დაუპირისპირეს.

სადამსჯელო ღონისძიებებს 21 ადამიანის სიცოცხლე ემსხვერპლა, მათგან 17 ქალია. ქალებს შორის ყველაზე უმცროსები 16 წლის უფროსი კი 70 წლის. იმდროინდელ ბეჭდურ გამოცემებთან ინტერვიუში აქციის მონაწილეები იხსენებენ, რომ ჯარისკაცები ყველაზე აგრესიულები ორსულების და მოხუცების მიმართ იყვნენ.

1991 წლის 9 აპრილს კი, მოსახლეობის ნებაზე დაყრდნობითა და პირველი რესპუბლიკის დამოუკიდებლობის აქტის საფუძველზე უზენაესმა საბჭომ საქართველოს სახელმწიფოებრივი დამოუკიდებლობის აღდგენა გამოაცხადა და აქტი გამოსცა.